fot. Adam Foster

Kaj idzie połoglondać zwiyrzynta, kierych niy poradzymy łoboczyć u nos w lasach abo w chałpach?

Momy przeca w Chorzowie Ślonski Łogród Zoologiczny i mogymy sie tam przyjść łobejrzeć roztomajte zorty zwiyrzont i mogymy to złonaczyć po ślonsku!

Najprzód ale muszymy przyjść przez brama, kiero kejsik była we Świerklańcu a potym mogymy sie kukać po klotkach i wybiegach na zwiyrzynta.

Kiej bydymy szpacirować po alyjkach ZOO trefiymy kamele (niem. Kamel), co majom dwa pukle, elefanty (niem. Elefant) ze srogom trompyjtom i uwziynte yjzle (niem. Esel).

W ZOO som i zwiyrzynta dropieżne: niydźwiedzie brunotne i himalajskie, znojdymy tyż czorne pantery, tigry, lwy z fajnom pińciom i gyparty, co poradzom fest gibko lotać.

Trefimy tyż i roztomajte zorty ptoków, co furgajom z asty na asta, abo sie ino na niyj siedzom np. ojle (niem. Eule).

Po stowach pływajom łabońdzie i ynty (niem. Ente), kierych niy mogymy za wiela futrować, a w egzotarium trefiymy wyzgerne afy (niem. Affe), gody i inksze krasiate papagaje (niem. Papagei), co czasym poradzom i z nami pogodać.

Blank nowe latoś bydom miyjsca, kaj trefimy giyrafy (niem. Giraffe) z dugim chyrtoniem i krokodile, co bez cołki żywot niy trzeba im gybisu, kej co im wyleci jaki zomb, to im wyrasto gibko nowy.

Dziynki takij rajzie do ZOO bajtle i trocha wiynksi mogom oboczyć czy poradzom wszyjskie zwiyrzynta pomianować po naszymu.

Artykuł łostoł napisany bez Basia Grządziel z Katowic.