fot. A METEOR SHOWER

Łostatnimi czasy, jak z rana stowomy i wylazujymy ze chałupy to widać cosik biołego na trowie. Te same biołe je na szybach ze auta, kere trza dropać, nim sie wyjedzie z placu. To je znak, że zima już ku nom ciśnie. Prziszoł czas, że to, co my schowali do szranku w kwietniu abo moju, zaś trza śniego wyciongać. Coby sie niy czynś jak sagi w pokrziwach, muszymy narychtować cało hołda lontów i strzewików, kere som na chrubej zoli, bo inakszy bydzie nas pierunym uziombać. Toż  radzymy Wom wyciongnijcie se ze szranku:

Mycka

Nakłodo se jom na gowa. Som tyż taki mycki, co sie je naciongo na uszy (tak zwano „rusowa”). Je łona fest ważno, bo dochtory godajom, że praje cołki ciepło ze człowieka cito bez łep. Nojbardziyj niych se to weznom pod rozwoga glacaci.

Glazyjki

Mogom być taki ze piyńcioma palcami abo ze jednym. Mogom być sztrykowane abo taki ze skóry. Glazyjki som niy mniyj ważne niż mycka, bo potem som pieruński mecyje jak zamarznom pazurska.

Spodnioki

To je bardzij do chopów. Młode synki fest niy radzi jich łoblykajom, bo im je gańba i to ni ma tryndi. Mono ni ma to richtik fest piykne, ale synki noście se te spodnioki, bo ni ma nic gorszygo jak Wom gyry przemarznom.

Fuzekle abo zoki

Nojlepij jakiś sztrykowane z owczyj wełny, ale tych w bele jakim gyszefcie niy kupicie. Mono kaj na Podhalu, abo jak Wom oma uhekluje.

Roztomańte cwitry.

Mogom być golfy, abo taki na szpic i tyż na knefle zapinane z przodku. To je egal jaki, najważniyjsze, coby grzoły.

Szalik abo jako chusta

Bez zima trza fest uważać na chyrtoń i na mandle. Mogecie se go zawionzać na roztomańte sposoby- abo na binder, abo łowinyć we kółko.

Mantel

Bez nigo niy wylazujcie! Nojcieplyjsze som flauszowe, a piyrwyj fest modne i pierunym ciepłe były te z baranij skory, na kiere sie godało „zakopianki”.

Strzewiki

Ino z chrubom zolom, w kierych idzie deptać po mokrym, rozmaźglanym śniygu. Bestoż, że terozki solom drogi, pamiyntejcie, żeby roz na ruski rok przejechać skóra gutalinym.

Dejcie pozór! Jak bydziecie se zapominać ło takij oblyczce, to na byzuchy, zamiast do kamratów, bydziycie deptać do dochtora z rymom!

Toż chowcie sie tam jako bez zima, pyrsk!