fot. Colton Witt

Szelontać znaczy po polsku potrząsać, zamieszać.

Szelontać idzie roztomajtymi płynami przi roztomajtych łokazjach. Nojwiyncyj jak sie fajruje, ale niy ino :)

Czasym sie spotko sok w kierym som farfocle na dnie. I coby go wypić, trzeja nojprzód nim poszelontać, coby sie dobrze wymiyszały.

Niykierymi napojami lepij je niy szelontać dejmy na to szampanym, abo kokom bo jak sie tak zrobi, to już nic sie niy bydzie z nich miało.

Nojwiyncyj szelontajom barmani, jak robiom drinki. Coby sie wszyjstko fajnie wymiyszało i dobrze potym szmakowało. To dziepiyro je sztuka, coby poradzić tak szelontać.

Niykierzy godajom że poszelontać idzie tyż tytkom z ryżym. Inaczyj to sie godo, że sie majto. Szelontać idzie tyż miechym z piniondzami.

Pora lot do zadku szło tyż dostać tako kula ze śniegiym, kierom tyż sie szelontało. Było tyż tam przedstawione Boże Narodzyni, Panna Maria i Chrystusik. Stoł Józef i posadzony był stromik. I jak sie tom kulom poszelontało, to tyn śniyg fajnie lecioł.