fot. hktang

Raja to je po polsku rząd, kolejka.

Jak sie godo, że stoji sie w raji, to znaczy, że stoji sie w kolejce i czeko sie na swoja kolyj. Wyglondo to tak, że jedyn stoji za drugim. Idzie czekać w nij ledy kaj: do gyszeftu, autobusa i do doktora.

Czasym sie taki pieron trefi, kiery wynokwio coby tu zrobić, coby być bliżyj. Tak teroz je nojczyńścij jak sie czeko przed wyciongiym narciarskim. Niykierzy cyganiom, że wtoś na nich czeko z przodku i sie cisnom.

Cołki szczyńści, że ni ma już tych rajów, w kierych stoło sie jeszcze poranoście lot tymu, w tamtym układzie. A stoło sie i stoło i czekało. I stoło sie za wszyjstkim, chocioż czasym sie niy wiedziało za czym sie stoji. A było i tak, że niczego niy szło dostać. A i tyż niykiery sie trefił, że sie wrył i potym sie godało: „Powiydz mu coś, przecaś łon tu niy stoł, niych sie biere, idzie na zadek i niych se stanie za rajom”.

Ale taki stoni w raji to zaś niy było taki nadarymno, bo baby ze sobom klachały i sie mogły ło bele czym dowiedzieć. Dlo chopów to zaś niy było nic gryfnego i jich to nerwowało. Dlo bajtli tyż niy, bo łone wolały se polotać po placu.

W raji stoło sie tyż we wojsku abo we szkole, jedyn wele drugigo. Nojczyńścij na wf-ie. Godało sie wtedy: „Ustow sie do raje”.

Jak już sie łodstoło tela, wiela było potrzeja to był dran czyli moja kolej.