fot. allenran 917

Parfiny to som po polsku perfumy.

Woniajonce wody w gryfnych małych flaszeczkach, kiere majom wypachnić człowieka. Psikomy sie nimi przed kożdym ważniyjszym wyjściym. Nojwiyncyj jak sie idzie do kościoła, na jaki byzuch, gyburstag abo inksze fajrowani.

Nojbarzij  jich majom rade frele, frelki, mamulki, baby, paniynki. Ale nojgorzyj jak sie tak pora babów poparfinuje i siednom se w jednyj ławce i ty wszyjstki zapachy sie pomiyszajom, to niy idzie strzimać.

A zapachy parfinów som roztomajte. Jedne woniajom kwiotkami, inksze zaś choby sie zmaszkeciło jaki owoc. Jedne som fest słodki, inksze delikatniyjsze. Dlo kożdyj baby inksze, podug ji podobań.

Ni ma co dować na jakisi fajrowani parfinów, a to skisz tego, że idzie niy trefić w gust tyj osoby. Czasym lepij kupić jako bombonierka abo kwiotek, bo pocóż taki parfin mo potym stoć na szafce i mo sie na niego kurzić a szkoda go tyż wyloć. Bo jak parfin niy spasuje, to sie wiyncyj łostudy nim sie narobi niźli pożytku, no chyba, że sie zno ta osoba i wiy co łona mo rada.

Nojlepij jak sie trefi na taki parfin, kierego już potym niy idzie nikaj dostać. Bo sie go potym długo jeszcze pamiynto, a jak sie go se samymu wybiere i to łod osoby, kierej sie przaje, to dziepiyro sie go pamiynto.

Parfiny podobajom sie tyż chopom, ale łoni barzij używajom woda po golyniu. Chocioż som i tyż tacy, kierzy tyż radzi sie łoblejom wonidłym. Niykiere karlusy sie parfinujom skisz tego, coby sie za nimi łobracały frelki.

Parfin biere sie tyż ma śmiyrgust we świynta Wielkanocne. I delikatnie pokropio nim dziołchy. Rozchodzi sie ło to coby były zdrowe, mocne i coby wejrzały na tego wto jich kropi i se z nim zaczły godać.

Jest tyż taki ślonski powiedzyni: parfinować komuś. Słyszy sie go jak jedyn coś tam godo, drugi mu zachwolo ta jego godka, jak by my to dzisio piyknie pedzieli, że mu słodzi.