fot. josemanuelerre

Paniczka to je tako frela kero fest o sia dbo i kero zawdy mo oblyczka jak z modyheftu. Łona ani po gymiza na torg niy wylezie z chałupy bele jako obleczono.

Co kwila tyż depce do fryzjera, a to po farba, a to łoszczic sie abo jeszcze co inkszego zrobić ze szkutami. Jak myje krom w doma to zawdy w guminanych glazyjkach, coby se niy zepsuć lakeru abo tych sztucznych nalotych pazurów. Mo wdycki fajerski zauśniczki, kety i pieścionki.

Na tako baba chopy zaglondajom łoczami jak cielynta. Paniczki o tym wiedzom beztoż rade sie aszom.

Teroz w tych telewizorach, internetach i gazetach kolorowych je wielko moda na pokazywani takich paniczek. Tam bardzo niy łobejrzicie zdjynć, kaj baba ciśnie z taszami cało sparzono ze sklepu.

Baby niyzależnie łod tego, wiela majom lot, łoglondajom taki mustry i wiela na to poświyncajom czasu i piniyndzy, by zawdy piyknie wyglondać. Same na sia wywiyrajom tako presjo, żeby sie wszystkim podobać. Godo sie, że to ni ma nic złego. Recht. Ni ma. To je taki znak czasu. Ino życi czasym wyglondo inakszy i ni mo sie tela czasu, coby przed zdrzadłym siedzieć godzinami. Weźcie se dziołchy taki piyrszy lepszy przikład. Dyć niy lygomy tak jak w tych serialach pomalowane, niy stowomy pomalowane i zaroz niy siodomy z wysztryndzonom frizurom do śniodanio w wybiglowanej kiecce i szpilach na szłapach. Kero mo na to czas?!

Ni ma co przesadzać, bo idzie zgupnyć. Momy tela roztomańtych inkszych atrybutów, że jak czasym pociongnymy krziwo kryska czornom kredkom abo niy bydzie jom wcale, to sie nic wielkigo niy stanie.

Artykuł łostoł napisany bez Zuzia Karwot z Rydułtów.