fot. Radosław Kaźmierczak

W naszyj godce je kupa mian, kiere mogymy ciepnyć, kiej chcymy pedzieć na jakigoś bajtla.

Najduchy i miglance

I tak, momy takigo najducha, co ino patrzy coby cosik zgłobić. Włazi z paskudy do paskudy i jest fest rozwieziony. Je tyż jeszcze taki miglanc, co to sie ino migo. Koże sie mu dejmy na to łoszkrobać kartofle, a łon na zicher zmyśli, coby tego niy robić. Fest wiyzgerny, nale migol!

Podciepy 

Fatrowie, kiej sie zgorszom na swoje bajtle mogom im pedzieć szpetnie, że som podciepy. Miano to wziyno sie z powiastki, że zgłobliwe dziecka podciepywoł som dioboł. Taki bajtel ino durś ryczy w tyj kolybce i niy idzie se dać z nim rady.

Pyrtki i cwergusie

Momy tyż miana skuli tego jak bajtel wyglondo. Kiej jest fest mały idzie mu pedzieć, że je pyrtek abo cwerguś. Z takim bajtlym idzie strzimać, bo nom ani do stołu nie siyngie i niy pościepuje, co tam momy narychtowane.

Nale som i fest zgłobliwe bajtle, takie gizdy, co to ino poradzom pyskować.

Soronie, rojbry, huncwoty i gizdy

Taki soronie, co to som niydouczone i ino fandzolom trzi po trzi, abo rojbry, co to bydom ino durś robioły kupa larma – bydom sie prały na placu i robiły łostuda. Som fest niyusuchliwe. W gowie im ino haje i błozny. Cygon nigdy niy bydzie godoł prowdy a z huncwotym to ino bydzie kupa starości, bo z niego nic inkszego niy wyrośnie ino jaki chachor.

Ciućmoki i fifroki

Coby ino nasz bajtel niy był ciućmiokiym abo fifrokiym, bo skuli tego je wiyncyj roboty i łostudy. Fifrok nom sie zowdy pociapro abo pokido, ni ma na to rady a z ciućmokiym to ani niy wiysz, co złonacy. A to sie kajś obali abo sie klupnie eli prasknie i bydzie łaził poślimtany z ojlom.

Wyglondo, co niy ma galantnych bajtli, nale coby sie ftoś niy ciepoł o nasze dziecka, zawdy mu idzie pedzieć, co mo ała, dwa boloki a jego dzieci som glacoki.