fot. Curtis Simmons

Już je wrzesiyń. Tyn miesionc wskazuje na to, że świynty czas wylyź sie do lasa na grziby.

Nojlepszy, jak pora dni przed tom rajzom kapnie co z nieba i miesionczek bydzie w pełni. Wdycki to trza brać jaki koszyk z wikliny, łostry noż, niy żodyn pitwok i żodne plastikowe epy, bo w nich sie grziby parzom i ciś do lasa. Tam już na nos czekajom roztomańte łokazy.

W młodnikach znejdymy maśloki, a w brzozkach trza szukać kozoków, poloków i zajonczoków.

Tam kaj je las miyszany, kaj je trocha i sosyn i buczyny, kaj też stojom dymby, znejdymy bezmała nojbardzi przez grzibiorzy poszukiwanego prawoka. Tego idzie poznać gibko, bo mo pieronym chrubo szłapa i jak już pora dni se postoi, to bydzie fest dorodny.

Zaś we sosnowym lesie znejdymy podsosnówki. To tyż ganc dobre grziby, kere nadowajom sie, z resztom jak i prawok, na zupa i na smażonka, ale tyż na suszyni i zaprawiani we łoccie.

Maślok je smakowity, ale tyż niy bez powodu sie tak nazywo – je mlaźgaty i niego sie ususzyć niy do. Kozok tyż je za mokry i na susz sie niy nadowo.

Wiela ludzi, kerzi sie fest znajom na grzibach zbiyrajom tyż pnioki, kurki i kanie. Z tymi kaniami trza dać fest pozór bo z wyglondu podane som do sromotnioka. Żeby po zjedzyniu kotleta grzibowego (bo na to sie kania nojlepi nadowo) niy wylondować na ojomie!

Zortów grzibow je dużo wiyncy. Jo sam napisała ło tych nojbardzi znanych no i o takich, co sie je szamie. W kożdym razie, zbiyrani grzibów mo same plusy. Bo niy doś, że idzie po lesie szpacyrować, to mogymy zrobić forot na zima. A wto by chcioł być zdrowy bez tyn rok i na bezrok, to nojlepij jak łogłapi jako brzózka w lesie. To łona wyciongnie śniego wszystki pierziński choróbska.

Toż ni ma na co czekać! Las na Wos czeko!