fot. christian.senger

Macher to je po polsku „złota rączka”.

Godo sie tak na Ślonsku na chopa, kiery poradzi zrobić zawdy wszyjstko. Łazi sie do niego, kiej jako rzecz ślag trefi. To czowiek, kiery poradzi sie w życiu znalyźć, poradzi wszyjstko załatwić. A szczyńścim je, kiej mo sie takigo w doma.

Je tyż jeszcze fachman. To je taki czowiek, kiery mo fach w rynku. Czyli dejmy na to szwoczka, kiero tak poradzi se łobmyśleć, że z kuska materiału uszyje naprowda szumny klajd. A czasym do sie jaki inkszej a ta niy poradzi już tego tak uszyć. Abo dejmy na to je stolorz, kiery sie zno na tym co robi i mo taki rynce, że kożdy, wto włazi do dom, to sie dziwuje tymu gelyndrowi, że łon taki gryfny.

A różnica miyndzy macherym a fachmanym je tako, że fachman mo na to, co robi papióry a macher ni mo.

Kiej by trzeja było wybrać, czy iść do machera, czy do fachmana, to wiyncyj by sie poszło do tego drugigo, bo macherowi czasym może coś niy wyńść. Ale zaś z drugij strony macher weźmie mynij geltu, abo wcale.

Terozki już ciyżko trefić na machera, a to skisz tego, że roztomajte rzeczy som tak zrobione, że sie niy do jich naprawić. Downij zaś dłużyj to wszyjstko poradziło pociongnyć. A teroz na hasiok i nowe.

Je tyż drugi określyni na machera. Je to taki trocha cygon, kiery tukyj coś wrazi, tam coś złonaczy i niby działo, ale potym zaś trzeja prziść do niego drugi roz. Abo lepij niy prziłazić.