fot. Mohammad Afshar

Gibać sie to je polsku spieszyć sie, ruszać sie żwawo, chwiać, kołysać.

Gibać sie, to je słowo, kiere je teroz fest na czasie. Ludzie dzisio sie wszyndy śpiychajom, wszyndy sie gibajom. Bo przeca tela je rzeczy do zrobiynio. Taki momy dzisiyjszy świat. Bo szybcij to je lepij, tak niykierzy godajom.

Nojlepij to widać jak som jaki świynta, jak sie pódzie kaj do sklepu, to sie widzi jak ludzie lotajom, choby muszyska w szklonce. I niy wiadomo skuli czego wszyndy ino gibko. I czasym niy wejrzom, co bierom. I potym jak do dom z tym przydom, to se godajom, że to ni ma to co chcieli.

No, ale lepij je niy robić niykierych rzeczy za gibko. I to je prowda, pra.
Ale tyż z drugij strony, jak wto co robi fest pomału, to tyż niy dobrze. Godo sie ło takim, że „mo ale ruła”.

Jak wtoś sie gibo, to poradzi robota zrobić na czas. Ważne ino coby to zrobić na zicher. Terozki to kożdy majster by chcioł, coby jego pomocnik sie giboł, bo przeca gibcij robota zrobiom i pódom do dom.

To gibani to sie tyczy raczyj młodych ludzi. Starsi już se to wszyjstko poleku bierom. Łoni możno by chcieli sie gibać, ale niy zawdy poradzom.

Gibać idzie tyż bajtla w kolybce. Jak sie go tak pogibo, to gibcij uśnie, bo to gibani poradzi go uspokoić. A jak jeszcze do tego sie mu pociśnie nupel, to spi choby aniołek.

Je jeszcze coś takigo jak gibadło czyli staw kolanowy, barkowy, ale tak sie za czynsto niy godo. To ino niykierzy wiedzom ło czymś takim.