fot. cinnamon_girl

Fuzekle abo zoki to som po polsku skarpety.

Czowiek łod nich zaczyno dziyń, bo kiej rano wstaje łoblyko jich na szłapy. Niykierzy godajom, że to som skarpety ino dlo chopów. A inksi zaś, że baby tyż jich do galotów łoblykajom.

Nojgorzyj je, kiej sie mo poru synków w doma, to durś tych fuzekli ni ma i durś je ło nich zwada. One sie durś tracom, chocioż kupuje sie nowe. A zawdy je tak, że kiej sie robi prani i potym sie jich ukłodo w pory to nigdy ni ma tak, coby były wszyjstki pory, zawdy kierejś brakuje.

Downij fuzekle sztrykowała starka. A żodyn bajtel niy chcioł w nich łazić, a to skuli tego, że było w nich fest gorko. Ale trzeja było jich łoblykać.

Jak było lato i sie łoblykało krótki galotki i dejmy na to szło sie na droga, to trzeja było ku tymu łoblyc długi fuzekle. Łony niy miały gumki a coby niy ślatywały z nogi, to były do nich taki zapiyńcio taki haltry abo kiej niykierzy godajom szlajfki.

Dzisioj kiej sie zrobi dziura, mało wto jich sztopuje, raczyj sie jich wyciepuje do hasioka.

Niykierzy na fuzekle godajom tyż zoki. Kiej by sie kogo spytać ło to,  jako bydzie różnica miyndzy fuzeklami a zokami, to jedyn powiy, że to je to samo. Inkszy zaś, że fuzekle to som inakszyj onuce, abo długi skarpety a zoki to som taki ino do kostek. Je tyż tako teoria, że fuzekle łoblyko sie do ledy jakich strzewików i łobleczynio a zoki ino wdycki, kiej sie łoblyko ancug i fajne strzewiki.

Jedni zaś godajom, że jak skarpety som czyste, to godo sie na nich zoki a jak som zmazane, to już som fuzekle, abo tyż nałopy.

Jedno je pewne, łobojyntne jak by my na nich godali i tak ta drugo zawdy ciyżko je znojść :)