fot. David Levitz

Przichodzi taki czas u kożdygo chopa, że musi łoblyc binder. Niykerym już mamulki binder oblykajom do Piyrszej Komunije.

Oblyko sie go tyż na jakiś egzaminy w szkole, bo rechtory krziwo zaglondajom na tych, co przichodzom, do przikładu na matura, w rozlajrowanym cwitrze z torgu.

Potym je ślub a tu też niykerzi depcom po czyrwonym tepichu do łołtorza w bindrze (inksi majom muszki abo jakiś formycle).

W bindrze chodzi sie tyż na geburstagi i inksze fajery, no a w końcu oblykajom chopa tak do truły, żeby se móg punktów natrzaskać u śwjyntygo Pyjtra, nim łon go do Nieba bez ta szyroko brama wpuści.

Chopy niy za fest radzi deptajom w bindrach, bo to pieroństwo ciśnie w chyrtoń. Som niykere taki panoczki, co cołki czas depcom w bindrze, ale to pywnikiym, że muszom a niy, że chcom. Ja… dyrektory, adwokaty i inksze tego typu gowiedź tak majom.

Bindry som roztomańte: skórkowe, ze sztofu, jedne sie zawionzuje (to tyż niywiela chopów poradzi), inne som na gumie.

Nastoł terozki taki wiek, że w bindry sztryndzom sie wszelki maści paniczki. Taki czasy! Ni ma sie zresztom co dziwić. W końcu terozki niejedna baba keruje fligrami, a ich chopy glancujom szałfynstry i warzom obiod.

Artykuł łostoł napisany bez Zuzia Karwot z Rydułtów.