Fot. shingleback

Bajukać to je po polsku raczkować, gaworzyć abo tyż mówić głupoty.

Bajukani to je kiej bajtel zacznie łazić na sztyrech. To wyglondo tak, że jedna szłapka podkłodo pod drugo i ciśnie po leku do przodku, tak sie czołgo. I zaczyno sie dźwigać. A jak już se stanie to wdycki zaczyno sie łostuda. Bo tu sie szczasko, tam coś ściepie, zaś kaj indzyj łotworzy drzwiyrza do byfyja. Z takim to już je wiyncyj sromoty.

Niykierzy godajom, że bajukani tyczy sie tyż takich fest małych bajtli. Jak napoczynały godać po swojimu. Tak po prowdzie to niy wiadomo ło co sie takimu rozchodziło a już mioł coś do pedzynio. To było coś na podoba jakigoś słowa, ale niy szło tego spokopić.

Bajukać to je tyż godać gupoty. To sie wdycki bajuko jak sie zesyndom dwie klachule i ło bele czym beblajom. A nic z tego co pedzom niy je prowdom.