fot. Brandon Christopher Warren

Hercklekoty to je po polsku kołatanie serca, szybsze bicie serca.

Idzie jich dostać bele kaj, a nojpryndzyj kiej synek z dziołchom se siedzom kole siebie. Ale niy ino, bo tyż czasym kiej sie zmówiom na kieroś godzina na zolyty, to potym łoba majom ty hercklekoty, bo niy umiejom sie już doczkać, kiej sie łoboczom.

Ciyżko je pedzieć jak to śnimi je, bo kożdy jich inakszyj przeżywo. Ale to wyglondo tak, że fest sie czuje, kiej klupie syrce. Łono sie tak ruszo. I tego sie w żodnym razie niy do zasztopować.

Czowiek je wdycki w jakimś inkszym stanie, taki jakosikuj łodmieniony. Jak sie jich mo, to zdarzo sie tyż, że czowiek cołki poradzi potwarnońć i potym tyż czasym nic niy poradzi pedzieć. Je taki znerwowany, ale tak fajnie znerwowany. Niy wiy tyż czy dziołcha go bydzie chciała, abo niy.

Ale łod tego przynojmnij ni ma hercszlagu. Bo to je taki lekutki. Herszlag idzie zaś dostać, kiej sie mo łostuda ze syrcym. Abo tyż czasym na drodze, może chycić kożdego. Niykierzy ty hercklekoty z tym hercszlagiym metlajom , ale to je co inkszego.

Hercklekoty to je tyż  łokreślyni, na kiere w lazarecie godajom niyrówne bicie syrca, palpitacje, abo arytmia, ale to już je co inkszego, poważniyjszego niźli te, kiere sie mo karlus, kiej sie uwidzi jako szwarno frela. Jak sie mo hercszlag, to idzie tyż sie znojźć na drugim świecie.

To słowo sie wziyno z nimieckigo łod herz czyli serce a klekoty, to je to bicie serca, to że sie to syrce ruszo, że łono klupie. To je taki niykontrolowane klekotani.

Czasym wtoś móg jich mieć łod urodzynio. Czasym tyż idzie jich dostać w robocie, jak sie na coś znerwujymy.

Szło tyż jich dostać za bajtla, kiej sie lotało na obst kraść jabka a jak sie pokozoł tyn, łod kogo była ta działka, to sie ale pitało i miało sie wdycki ty hercklekoty.