Wylyź z doma
Zima już do nos prziszła. Śniega terozki za wiela ni ma, ale bezmała godajom we telewizorze, że mo być i trza dać wiara, że tak bydzie.
Na piyrszy ogiyń pódom narty. Przeca na naszyj ziymi momy niy ino gruby, huty i łosiedla, ale tyż pieronym piykne rejony, kaj idzie se pojeździć na deskach. Wisła, Szczyrk, Koniaków i wiela inkszych miyjsc je poranoście… no abo poradziesiont kilometrów łod serca Ślonska. Ino godzina jazdy, możno deczko wiyncyj.
Tam idzie cołki dziyń, a i wieczor popylać na nartach. Je tam mocka roztomajtych stoków- ze krzesełkami, abo takimi wyciongami, co sie talyrz dowo pod żić. Z kożdego zjazdu, czy to zygzakiym czy na krycha mo sie niymało uciecha- łod bajtli po starzików!
Komu sie niy bardzo kce abo tyż i ni może ta godzina pojechać do Beskidów, abo we tym aucie by sie mierzło i bestóż niy kce mu sie rajzować, to do rada zorganizować se czas na śniegu doma.
Nasz region je dość fest pofałdowany i mo mocka górek wiynkszych i myńszych, przeto idzie znejść po blisku, wele chałupy, jaki plac do szpilanio czy na sonkach czy tyż na dupolotach (kere dziecka fest majom rade). Wszyjsko to pódzie robić kiej spadnie śniyg. Ale musi chycić tyż mróz.
Jak pora dni przimrozi i bydzie dość chruby lód, to oblykomy szlincuchy! Dziołchy figurówki a synki hokejówy (chop czy synek z gańby niy łoblecze figurówek!). Nojlepij znejść se plac, kaj som sztuczne lodowiska, ale wszyndzi ich ni ma. Jeździć tyż idzie na stowkach, jakiś bajorkach, ale trza dać pozór i se rozwożyć czy lód je dość mocny i chruby.
Ferie to je gryfny czas, a samo zima i szpilani na śniegu i lodzie majom wiela uroku. Ino trza mieć rozum, żeby se półdopków niy potrzaskać na lodzie abo szłapów niy połomać na stoku. Toż wiycie… zabawa, ale tyż rozwoga, żeby potym do Świont Wielkij Nocy niy mieć szłapów abo rynków zagipsowanych.
A jak niy somżeście radzi poszpilać na śniegu abo śmigać na szlincuchach, to i tak wylyźcie z chałpy! Na placu se rozpolcie fojera, złonaczcie se jaki dobry wuszt, siednijcie na kuloku i powdychejcie se trocha świyżego luftu. Bo wiela idzie siedzieć przed komputerem abo cykać pilotym!?
Co byś na to pedzioł?