Kaj sie teroz idzie nauczyć ślonskij godki? Po piyrsze w doma, a kiej żodyn w doma niy godo? To we robocie, a jak niy we robocie? To dziynki Ufokom, kiere uczom ślonskij godki. Je to facebookowo zajta, kierej łojcym je Tomasz Gorol, blank Ślonzok.

Co to som ty Ufoki?

To som osoby, kiere chcom działać na Ślonsku, chcom uczyć sie ślonskij godki, poznawać nasz region i kultywować ślonskie tradycje.

Ło co sie śnimi rozchodzi?

Ufoki to taki badani, eksperymynt. Chciołech sprawdzić, czy taki coś bydzie sie podobać, czy jest na to zapotrzebowani, czy we takij formie i co nojważniyjsze, czy ludziom na Ślónsku jest dalij potrzebno naszo godka, czy ta godka, tyn jynzyk może sie podobać, tak u nos jak i poza naszym regionym.

I sie łokozało, że ja.

Dyć. Toż żech zrychtowoł tako opowieść, do kierej tyż już je zaprojektowano ilustracja. Terozki jeszcze wszyjstko trzeja dopracować. A mo to być cykl ksiożek nojprzód dlo bajtli. Ksionżki niy ino ze łobrozkami i tekstym, ale bydzie można z nich poskłodać chałpka dlo Ufoków.

A to, co mo trefić na ufokowy łobrozek je skond wziynte? Brali Cie do ściepowanio wongla?

To je aktualne, bo jo dalij ściepuja, a ty historyje bierom sie nojczynści z mojigo życio.

Je szansa na Ufoki animowane?

Fajnie by było, ale tukyj by trzeja pomyśleć nad formom. I drugo rzecz to je gelt i co nojważniyjsze czas, bo miarkuja co chyntnych do pomocy przi takim projekcie by nie zabrakło.

Wto je łodbiorcom ślonskij godki?

Downij to naszo godka była znano we chałpach. Pogodać sie można było na placu ze bajtami, na torgu, we radyjku boły prowadzone audycje po naszymu i to boło richtig nasze, ale to telewizyjo pokozała cołki Polsce z cym sie wionże jynzyk ślonski, kedy wyemitowali Świytno Wojna, co na wiela lot przylepiło Ślonskowi stereotypowo metka, bo wtedy kożdy chop ze Ślonska to był Bercik, boł sie swojij baby i coś kombinówoł ze gorolami.

Terozki to minyło, erzac sie niy sprzedaje i som osoby, kiere szukajom czego innkszego, na wiynkszym poziomie. Robiom rzecy kerymi można sie chwolić a niy takie, za kiere sie trza wstydzić. U nos zaczyno sie dziepiyro budzić świadomość ślonskości i tym, czym je Ślonsk. Coroz to wiyncyj młodych ludzi zaczyno godać o historii tyj Ziymi, chce ło tym godać i to poznawać.

Na codziyń jeżeś grafikiym, toż czujesz ty klimaty estetyczne. Jako je Twoja ocyna sytuacji graficznyj w ślonskich inicjatywach?

Je niywiela takich inicjatyw, w kierych identyfikacja wizualno je na wysokim poziomie. A za przikład podom krój pisma Silesiana, kiery niy je świyży. Niy wyobrażom sie jakichś srogich publikacyji, plakatów abo cajtungów. To niy je pismo użytkowe ino ozdobne. Trzeja myśleć ło przeszłości ale pokazywać przez to, co teroz je na czasie i zwracać srogo uwaga na użyteczność. Richtig mało je ślonskich marek gryfnie zaprojektowanych, ale musza pedzieć, że som tyż takie kerymi sie idzie chwolić.

Czy coby godać po ślonsku, to trzeja tyż chodzić w stroju, czy łobleczyniu, w kierym łaziły nasze starki?

Po piyrwyj Ślonsk trza mieć we sercu i we gowie. Myśla, że coby godać po ślonsku starcy niy tyla umieć, co chcieć: albo kultywować albo sie ucyć. Teroz to jak wto sie wejrzy na „Ślonskie” szlargy to niy wiy ło co łazi. Chop we sombrero, śpiywo po ślonsku ło Meksyku. Coś je tukyj niy echt!

Jak padosz, czy to sie kiedy skończy?

Ja, jo widza, że moji znajomi tego niy słuchajom, a co dopiyro Ci jeszcze młodsi. I mało je alternatywy na dobrym poziomie i coby boła we zastympstwie tych nowych „szlagrów”. Ale myśla, że powoli, powoli… jak to godajom: ”langsam langsam aber sicher” i za chwila posłuchomy i łobejrzymy coś, co bydzie dobre i w dodatku ślonskie. Toż jeśli wtoś bydzie chcioł sie za to wzoś, to powiniyn bazować na tym co tradycyjne, a niy wymyślać chopów w sombrero.

Dziynkujymy za ty słowa i winszujymy powodzynio!

Wejrzyjcie na: http://www.facebook.com/UfokiUczaSieSlunskiGodki