fot. Radosław Kaźmierczak

Skisz tego, że jutro świynto wszyjstkich grubiorzy, wort je kapka łopedzieć ło jich robocie, pra. A jak wyglondo szychta na grubie?

Kożdego dnia, tak wele piontej rano, grubiorz, kery idzie na piyrszo zmiana musi stować z prykola.

Gibym sie zbiyro, troszka pychol oszplucho, biere paketek z chlebym i ciśnie na gruba.

W łaźni sie pryndko przeblyko w łachy, kere som do roboty, biere lampa, aparat ratunkowy i idzie na szyb. Tam z inkszymi kamratami czeko na szola, kiero go zwiezie na łodpowiedni poziom.

Jak już je na dole, siodo do bryczek (taki wagoniki, kiere przewożom dołowych) i czeko aż go zawiezom do oddziału w kerym robi. Jak już wagoniki ruszom, może se jeszcze trocha podrzymać, ale niy trwo to za wiela czasu.

Wysiado sie na banhofie oddziałowym i depce piechty reszta drogi do przodka, w kierym sama robota trwo coś wele sześciu godzin.

Robota je ciynżko, łodpowiedzialno i fest niebezpieczno. Grubiorz ło tym wiy, ale niy rozważo cołki czas ło tym, bo by wzion i zgup i nic by nie zrobiył.

Kożdy chop mo tyż kwila coby wcinać to, co mu baba w paketku naszykowała. Przeważnie je to chlyb z fetym i jakomś bajlagom (woszt, szynka). Spytocie sie czamu praje z fetym? Fet w hycu jaki je na dole nie jałczeje tak jak masło.

Jak sie skończy szychta to gibym sie zbiyro na wyjazd, a jak już wyjedzie to jedynie co mo jasnego to zymby. Taki cołki czorny pryndko sie myje, oblyko i…jak myślicie, kaj idzie? Zgodliście… na piwo! Kożdy, wto robi na dole, a spytocie sie go na co mo najwiynkszo chynć po zrobionyj szychcie, to wom bydzie bojać o piwie jak o nojpiykniyjszyj lipście! To je najlepszo nagroda po ciynżki robocie.