Ło szoferach i jich rajzach

evan-kirby-104799
fot. Evan Kirby

 

Ponboczkowo taksa

Świynty Krzisztof łod zawsze je pokazowany na bele jakich łobrozkach i mydalikach jak niesie na puklu Dzieciontko Jezus. Rychtig tak ponoć było. Stare omy hankejsi naszkryflały i tak się to przijono, że Krzisztof mioł sztyry metry wzrostu, pleca srogi jak trzidrzwiowy szrank i pierońsko siła. Skuli tego do roboty łaził nad rzyka coby przekludzać ludzi na drugo strona. Jednego dnia prziszoł ku nimu mały syneczek, kiery chcioł drapko znojś się na drugim brzygu. Toż Krzisztof go majt na ramie i ciśnie, ale niy poradził się ruszyć bo się zatoploł we marasie do samego pasa. Na to tyn bajtel mu pado: „ Jo je Ponboczek, a ciebie beztoż tak ciynżko, bo dźwigosz cołki świat i wszyjski jego łostudy”. Tak to Krzisztof nosił ludzi, a służył Ponboczkowi. Jak umrził i łostoł świyntym, to mianowali go patronym mostów, nikierych miast, wszyjskich tych co się wybiyrajom w długi rajzy, flisoków, a na samym przodku szoferów.

U Krzisztofa we Tychach

Krzisztofa spomino się 25 lipca. Je tako tradycjo, że we niedziela nojbliżyj tego dnia świyńci się we wszyjskich kościołach auta, mopliki, koła i inksze środki transportu. Nikierzi, widziołech kiedyś, nawet wózyk łod bajtla dali farorzowi pokropić. Nojwiynksze taki świyncyni jest kole kościoła Św. Krzisztofa w Tychach. Co roku przijyżdzo tam w pierony bele jakich autów, tak że ształy som łod samych Paprocon aż do kierchofa na Wartogłowcu, a ze kropielniczkom loto miyndzy nimi som nasz katowicki biskup. We tyn dziyń je w tyj parafii łodpust i wszyjscy rzykajom o bezpieczyństwo na cestach, a we cołkij diecezji je wielki świynto.

Sromota, a uciecha

Kej Krzisztof jest patronym łod szoferów, to może tyż napisza pora słów na tyn tymat. Downij autów było mało, bo były sromotnie drogi, ciynżko było kupić, a i mało wto mioł prawo jazdy. Dzisiej to kożdy, kiej mu piźnie łoziymnoście lot, zarozki się zapisuje do szpecjalnyj budy, robi kurs i zdowo egzamin, a potym może jeździć do woli autym po drogach. Ni ma to wcale taki proste, jak by się mogło zdować, ale taki momy czasy, że bez auta – jak bez rynki. Zy mnom tyż tak było. Prawo jazdy zdołch, ale autoka żodnego jeszczech ni mioł. To na piyrszo rajza wzion mie kamrat ze szkoły. Byłżech tak podhajcowany, że moga jechać, żech przegolił zjazd do mojigo placu i musiołch sie wracać pora kilometrów. Potym robiłech bez cołki wakacje z mulorzami za halangra, coby uszporować i se kupić jakigo zdechloka. Wtedy to sie dopiyro zaczona łostuda. Psuło się to sztyjc, tankować bynzyna trza było, płacić ubezpieczyni i mechanikom za tajle, ale uciechy było tela, jak my mogli nad morze pojechać na jedyn dziyń, co nigdy! Potym żech mioł unfal, jak kożdy chyba młody szofer i beczołech jak bober, kiej musiołech te moji piyrsze auto wiyźć na szrot. Dalij było nastympne i nastympne, ale te piyrsze, to we mojij głowie bydzie na amyn.

Cylnyć cie może wszysko

Niy kożdy lubi szoferować. Jedni wolom siednyć na zadnim zicu i se kimnyć, inksi zaś wtynczos poczytać, abo pofoflać bez mobilniok. Ale som tyż tacy, co łod kierownicy niy łoderwie ich ani rugcugiym! Jo je jednym z tych łostatnich. Im dalij trza jechać, tym bardzij sie ciesza, chocioż nikiedy mie dopadnie rajzynfiber. Jednak zawsze jeżech fest rod, jak moga kaś pojechać. Trza pamiyntać ino, że jechani, to ni ma taki leki flaps. Trza dować pozór, coby niy zrobić jakigo unfalu… Zawdy szofer musi być blank krzyźwy, coby mu szmatów nie zebrali, abo czego niy napochoł. Na drodze może się trefić pana, abo nikiedy auto zacznie forskać i niy chce jechać, to tyż trza tymu poradzić, a niy spanikować. Szofer niy śmi sie za fest uwijać, bo sztrofy łod policajów kupa kosztujom… Trza zaglondać na kolorzy i tych, co łażom piechty, szczególnie jak sie zećmi. Bajtla trza przipinać do ekstra zica, a jak sie trefiom glajzy, to trza pierońsko dować pozor, bo z cugiym jeszcze żodyn nie wygroł. Na ceście wdycki sie dużo dzieje i trza mieć ślypia dołokolućka łepy. Nikierzi som tacy, co auto je im ino po to, coby kajś zajechać i przijechać nazod. Ale kupa ludzi (szczególnie chopów) uważo swoje autoki pomału za jednego z familije. Myjom co sobota, glancujom, godajom do nich, a jak im przidzie sie kaś wybrać, to fest majom w zocy swoje sztyry kółka. Jo je właśnie taki, i fest mi sie to podobo!

Tekst:
Daniel Dziubany

Co byś na to pedzioł?

tracy-thomas-56810

Ślonskie filmy

Godajom że ciynżko zrychtować dobry film o  naszym Hajmacie. Momy co prowda trocha klasyków, choby i “Paciorki jednego różańca” K.Kutza abo “Angelus” L. Majewskiego nale ciynżko znolyź teroźniyjszy film kaj poradzom godać po naszymu.

WIYNCYJ »

fot. Radosław Kaźmierczak

Panczkraut

Kiej biera sie za warzyni, mama mi godo, cozaś bydziesz to ciaprać? Mamo, niy starej sie, niy spola Ci kuchnie, byda ciaprać ciapkapusta.

WIYNCYJ »