fot. Radosław Kaźmierczak

Warzyni stało sie łostatnio fest modne. Kiej sie czowiek niy łobejrzy tam ło warzyniu godajom – w telewizorze, cajtongach abo na drodze. Terozki warzom wszyjscy. No toć, bo to je naprawda proste, trzeja ino chcieć. W kuchni kożdy może być majster, styknie gryfny fortuch, coby sie niy pokidać i może sie brać do roboty.

Naprzód trzeja nahajcować w piecu, chocioż terozki styknie ino naciś knefel (cz. knoflík) i idzie warzić.

Prawdziwy majster musi sie dować pozór, coby mieć wszyjstko narychtowane, nim zacznie warzić, coby sie poźnij niy nerwować, dejmy na to niy śmi być żodnych pitwoków, bezto trzeja je wszyjskie nabrusić.

Kiej sie chce robić zisty abo inksze kołocze, przido sie rogolka, coby wyfyrlać na poczontek ciasto, chocioż rynce tyż bydom dobre.

Warzechom idzie obadać, czy taki dejmy na to ajntopf (niem. Eintopf) nom sie już niy poli.

Nudelkulom (niem. Nudeln) wykulo sie nudle abo ciasto, nim sie je wrazi do bratruły (niem. Bratroehre). Każdo baba wiy, że idzie tyż niom postraszyć chopa abo jak sie fest niy słucho, to dać bez łeb. Je to werkcojg na roztomajte łokazje.

Idzie tyż wrazić latym łogórki do boncloka abo krauzów i zasuć solom, coby potym sie poasić zimom i mieć fajno zagrycha.

W kuchni som i pomagiery, kierzy poradzom sztamferym posztamfować kartofle, mogom kloprym (niem. Klopfer) ubić biołka a szupy wyciepać do kibla, kelniom mogom poloć polywka a na łostatek trzeja poschraniać wszyjstko do biksów, kiere trzeja wrazić do byfyja i pomyć kracerem wszyjstkie gorczki i bysztek, kiery momy w ausgusie (niem. Ausgus).