Szarlota – rydułtowsko hołda
Je taki miyjsce w Rydułtowach, kere widać już z daleka jak sie jedzie łod Rybnika, czy tyż Raciborza. To je tako pieronym wysoko górka, kero przez dwiesta lot powstowała przi grubie „KWK Rydułtowy-Anna”. Na tako górka żodyn inakszy niy powiy jak hołda.
Tam sie składuje kamiyń, kery na luft wylazuje z dołu gruby razym z wonglym. Takich hołdów na Ślonsku je pierońsko moc. Ale ta rydułtowsko je jedyno w swojim rodzaju. Nie yno skuli tego, że je jednom z nojwiynkszych i nojwyższych (bezmała 134 metry wysokości) w Europie, ale tyż mo swoi miano!
W 2007 roku zostoł rozpisany konkurs na nazwa tyj hołdy. Wygrało miano „Szarlota”. Wziyno sie to z tego, że dziesiontki lot tymu rydułtowsko gruba tak sie nazywała. Tak jom okrzciył właściciel, kery mioł cera, a kerej fest przoł. Ta cera mianowała sie Charlotte.
Po tym konkursie zostoł machnyty taki fest wielki napis „Szarlota” i cołki czas stoi na tyj berdze (bo u nas tyż tak sie godo na hołda) zamontowany. Tyn napis je praje taki wielki, jak tyn amerykancki w Hollywood. Na berdze rosnom roztomańte krzoki i stromiki, bez co „zamiyszakała” tam wszelkigo sortu zwierzyna. Som ptoki, lisy, fazany, hazoki.
Nic tam niy butluje, za to tej gowiedzi je tam fest dobrze. A butlu ni ma, bo na teryn bergi ni może se wlyź bele wto i bele kedy. Grubsko ochrona wachuje. Jednak miyjscowi niy byliby sobom jakby niy umieli tych wachtyrzy łokroczyć, bo widok jaki rozciongo sie z tyj górki je tego ryzyka wort. Przeto lezie sie na som wiyrch. Zresztom sami se to możecie w internecie łobejrzeć, bo pora ludzi wciepło tam zapis swojich wycieczek na „Szarlota”.
Je tyż pora takich zapolońców w Rydułtowach, kerzi na sportowych moplikach wjyżdżajom na som wiyrch. Przeważnie dzieje sie to w niedziela jak tej ochrony ni ma za wiela. Bez tydziyń by sie im tyn szpas niy udoł.
Jak sie jedzie cugiym relacji Rybnik – Racibórz to widać łod wschodni strony taki wylajrowany tor. Godali tyż na torgu, że mo tam powstać mini trasa narciarsko. Bydymy widzieć. Jak już bydzie gotowo, bydźcie pewni, dom Wom znać.
Co byś na to pedzioł?