fot. Radosław Kaźmierczak

Czy sie miyszko w domu, bloku abo we familoku trzeja sie starać, ło to, coby było czysto. Godajom tak, „Jak cie widzom, tak cie piszom”, bez to grunt, coby mieć wyglancowane łokna w doma, bo te kożdy ci uwidzi.

Okrom tego, że bydzie czyste, futrzyny nojczyńścij pomalowane czyrwonom farbom. A to skuli tego, że downiyj ino tako farba była dostympno dlo tych, co miyszkali we familokach, kierzy robili na grubach. Farba ta służyła dlo łoznakowanio na grubach, nale coby było gryfnie miyszkać dostowało sie jom i do dom. Godajom, coby niy robić sie gańba i niy łonacyć łokna na zielono abo bioło, bo tak niy robiom prawe Ślonzoki. Wiela jes w tym prowdy,  mało wto wiy.

Ślonskie łokno idzie tyż poznać po tym, że bydzie miało biołe, wyszkrobione gardiny i wybiglowane forhangi. Ponoć prawy Ślonzok se niy do, coby mieć rolety abo żaluzyje. W kuchni zaś zamiast gardin momy zazdrozki, takie ino do pół łokna, coby mieć durś podglond na to, co sie dzieje na placu, no i coby sie ich niy pomarasić przi kukaniu.

Na fynsterbret idzie stowiać gorkie gorki, coby sie niy złonaczyć kilszranku (kiej som fest gorkie) abo kiej kilszranku ni momy, bo dejmy na to my som sztudynty abo sie na tyla jeszcze niy uszporowali. Gibko poradzom łostygnyć, nale dejmy sie pozór, coby nom niy furgły, bo idzie kogo ubić, a i jodła szkoda. Latym w krzinkach sie idzie posadzić muszkatki abo inksze kwiotki i sie nimi asić, ino tak coby nom chroboki do dom z nich niy naszły, bo z aszynio nici.

A jak sie już łobrobiymy z robotom kole łokna, to sie mogymy na fynsterbret wrazić zogówek i sie dziwować, co sie dzieje na placu, coby mieć ło czym klachać abo ino łostawić pierziny, coby sie nom fajnie wyluftowały i robić inkszo robota w doma.