fot. Radek Kaźmierczak

Ślonsko ziymia to łod wieków był teryn, kaj ściyrały sie kultury, łobyczaje i zachowania ludzki trzech narodów.Richtik wielki wpływ na to, jak sie sam godo mioł jynzyk niymiecki, czeski no i polski.

Godka miała swoi odwzorowani w tym jako sie ludzi mianowało i jak łoni zaczyli sie mianować miyndzy sobom. Tak przez wiela czasu powstowały nazwiska ludzi, kierzy sam żyli i miyszkali łod zaranio dziejów. Nazwiska zmienioły sie, nastympowała ewolucyjo. Idzie pedzieć, że łone se żyły swojim życiym, jak to z resztom bywo w każdym jynzyku godanym czy pisanym na świecie.

Jakbyście se zrobili rundka po familokach i poczytali tabliczki na dźwjyrzach abo, co je teraz coroz czynstsze, na domofonach, to byście sie zaro kapli, kere z nich som od Ślonzoków, a kere ni.

Ślonski nazwiska som fest specificzne. Tu Wom napisza pora przikładow, a Wy sami pewnie w gowach znejdziecie wiela, wiela inkszych… Taki piyrsze, kere mi przichodzom na myśl to: Godula, Jezusek, Przibyła abo tyż Przybyła, Brzonkalik, Buła i Drabiniok. Jak sami pywnikiym żeście sie kapli, wszyski te nazwiska wywodzom sie, abo łod czegoś abo łod kogoś abo tyż od wyglondu.

Jak sie wtoś nazywo Płaczek toż na zicher wywodzi sie to miano z tego, że jego pra pra prastarzik co kwila beczoł.

Znejdymy tyż na Ślonsku Maryniókow, Buchtów abo Buchetków (dom se utnyć rynkowy z westy, że mo to cosik wspólnygo z żymłom abo drożdżowym gebekiym), Pateroków, Gorzelików, Pyrtków, Hachułów, Uszoków (zgodnicie łod czego je te łostatni?).

Som tyż Dyrdy, Grziwocze, Wypchoły i Wywioły. Suchanki, Hołomki i Rduchy też tu na tyj ziymi żyjom łod dziada pradziada.

Długo by pisać, długo by wymieniać. Jak spotkocie sie z takimi nazwiskami kajś w Polsce, w jakimś Kutnie czy Iławie, to bydźcie pewni, że ty ludki majom swoi korzyni na ziymi, kaj wyraz „kucnij” niy łoznaczo, że trza ciampnyć, yno tego boroka pewnikiym kilo w płucach i se musi łodkrzipać.

Artykuł łostoł napisany bez Zuzia Karwot z Rydułtów.