fot. gryfnie

Dzisiok Niedziela Palmowo, inakszyj nazywano tyż Kwietnio. Dziyń w kerym święcymy palma. Ale coby ją poświęcić trzeja ją piyrsze zrobić. Z jakich gałązek się ją robi? Zaroz Wom tu łokludzymy.

Piyrszym nojważniyjszym elemyntym są gałązki kotków. Coby fajnie narosły kocanki  trzeja je uciąć prędzyj i wrazić do wody.  Dalij gałązki lyski, jałowca, trzcionki ze stawów, bagnąci, tureckij sosny, bukszpanu, imioły, siby. Ta łostatnio czerwono je po, to coby palma łobwiązać na łokoło, coby trzimała gałązki w pojszczodku.

Jak już Palma się poświęciło, niy można ji było wyciepywać, ino spolić. Zakłodało się ją za święte łobrazy, a z gałązek siby robiło krzyżyki, kiere wkładało się w piyrszy Poniedziałek Wielkanocny we sztyry rogi pola. Łodmawiało się modlitwa i kropiło wodą święconą. To miało chronić dobytek przed niyurodzajym i klęską.

Poświęcone kocanki były nojlepszym medikamyntym na charlani a ryma. Skisz tego trzeja było je łyknąć.

A jak wyglądo Wasza palma i z jakich gałązek się skłodo?