Silesia Marathon 2012
Latoś czworto edycja Silesia Marathon. Łodbydzie sie trzecigo moja. Zapraszomy Wos do kibicowanio i zapoznanio sie z trasom, kiero trza bydzie przelecieć. To ino 42 km ;)
Kryska startowo namalowano je przy Aleji Korfantego na jezdni wschodnij kole Spodka. Piyrszo komynda, pora gibkich wdechów i zaczynomy.
Nojprzód Spodek, miyjsce kiere futruje nos gryfnom muzykom, szportym a fajnistymi wydarzyniami. Dalij cisnymy kusek Alejom Roździyńskigo, mijomy blokowiska „Gwiozdy” w kierunku Sosnowca i skryncomy na ulica Uniwersytecko, Moniuszki, Szkolno, Warszawsko, Mielęckigo, Mariacko, Francusko, Wojewódzko, Damrota. Tukyj je gmach naszyj ślonskij kopalni wiedzy czyli Biblioteki Śląskij. Jeji zbiory som tak łogromne i bogate, że kożdy znojdzie tu cosik dlo siebie.
Kole pięć kilometrów trzeja, coby przelecieć przez stolica Ślonska. Spokojniyszym miyjscym na trasie som Sztauwajery, pora kroków łod Muchowca, kaj przilatujom i łodlatujom fligry.
Latoś trefiła sie łokazjo, że trasa bydzie przebiygała przez Nikiszowiec. Naprowda piykne miyjsce, inkszy świat, choby z bojki. Zdaje sie, że wszystko mo tu swój porzondek, czuje sie w tym rynka człowieka, kierom pokierowoł som Pon Boczek.
Dalij wlatujymy do Szopiynic, dzielnicy kolejorzy, grubiorzy i hutników. I nazod do cyntrum Katowic Alejom Roździyńskigo. Tam je fest wysoko górka. Trzeja sie trocha namachać. Ale wort dlo takigo widoku. Hań po lewyj widać kopuła katowickij Archikatedry, po prawej stronie Spodek a na przodku Rondo Sztuki.
Wlatujymy na ulica Telewizyjno, Katowicko i Staszica w Siymianowicach Śląskich. We cyntrum trzeja se dać pozór, coby niy usnyć. Miyndzy kamiynicami wonio już ślonskim łobiadym: roladom, gałuszkami i modrom kapustom. Niy usnymy, bo niy dadzom nom bajtle z siymianowickich szkół, kiere zagrzywajom do gibszego lotanio. A potym zaś bydzie pod górka, skond kaj wejrzymy na lewo, to uwidzymy zachacharzone miyjsca po grubach. A po prawyj inkszy świat, łonki i łosiedla. Lecymy dalij.
Terozki my som we Chorzowie Starym. Wto tu niy miyszkoł, niy poradzi se wyłobrazić, co sie tukyj dzioło. Wiela szycht łobrobiło. Łostały ino sebleczone hale ze Huty Kościuszko i hołdy, na kierych czasym widać skokajonce jak sorniki bajtle. Świyczka kiero sie tukyj tlyła już downo zgasła.
Łostało yno 5 km plaskatyj trasy w szykownym Wojewódzkim Parku Kultury i Rozrywki we Chorzowie. Tukyj je raj dlo tych, kierzy radzi szpacyrujom. We Planetarium idzie połoglondać gwiozdki na gipsdece, we Łogrodzie Zoologicznym podziwać sie afom. A potym pobrusić we Wesołym Miasteczku na kecioku, abo poszczylać ze flinty.
Dalij na trasie momy Rosarium kaj idzie sie powoniać i łoboczyć nojwinkszo kolekcja rołzy we Europie. A potym jeszcze Chorzowski skansyn, kiery pokazuje jak downij ludzie żyli na Ślonsku. Po drodze momy tyż Stadion Śląski, kaj richtik chopy grajom w bal.
Jeszcze ino pora metrów i fajrant. Bydzie sie już szło dychnyć.
Tekst narychtowany dlo silesiamarathon.pl
Co byś na to pedzioł?