fot. Radosław Kaźmierczak

Latoś momy mocka roztomajtej muzyki i granio. Bydzie larmo!
Ino coby sie na ni wybrać, trzeja pora rzeczy wiedzieć. I my je Wom wyenklarujymy. Bo czasym ło takich rzeczach sie zapomino człowiekowi, niy?

Jak sie łoblyc?

Po piyrsze, zadbać ło łodpowiedni łobleczyni. Rygelmantel i paryzol to je podstawa. I wzoś se tyż coś na przebleczyni.
Nojprzód wlyźć se na pogodynka abo kaj to tam i sprawdzić co sie bydzie dzioło, pra.

Kogo wzoś?

Po drugi trzeja se znojść jakigo kompana abo kamrata. Razym raźnij! Ale ni ma co sie nerwować, jak sie go ni mo. Kompana wdycki idzie tyż spotkać na fajrowaniu. Ino tyż trza sie trocha wysilić i przegodać a niy czekać aż som przidzie.

Dejcie pozór na chachory!

I po trzeci papióry i gelt trzeja zawdy mieć przy sia. Nojlepij sprawić se nyrka. Tam kaj je fest naciśnione, tam som chachory, kiere ino czekajom coby łopyndzlować portmanyj. I narobić sromoty.

Kaj se stanyć?

Po czworte niy stoć na żodnym glaschórze ino wcisnyć sie jak nojbliżyj biny. Tam je nojwiynksze larmo! Ziymia sie kolyboce, w gowie szumi. Czuje sie muzyka cołkim syrcym.

I na łostatek pedzieć w doma ło kierej sie ściongnie.

Winszujymy Wom gryfnego fajrowanio. Pyrsk!

Zdjyńci, kiere tukyj widzicie było klipsniynte latoś na Dniach Województwa Śląskiego.
Tekst, kiery żeście tu poczytali, pokozoł sie tyż w lipcowym Magazynie Style.