fot. bardzoznaneimprezy.pl

Żodnymu sie niy śniło jak to naprowda wyglondo na dole. Niykierzy grubiorze godajom, że już wiedzom jak je w piekle. A co powiy tyn, u kierego to wszyjstko sie dziepiyro zaczyno? Ło piyrszej szychcie w życiu, piyrszej rajzie szolom i piyrszych pyncklerzach na rynkach godomy z młodym grubiorzym KWK Piast. Kuba bez tydziyń je karlusym, kiery mo ptoka na puncie bruszynio na kole i kopyrtków w lufcie. 

Jak wyglondoł piyrszy dziyń Twojij roboty na grubie?
Mój piyrszy dziyń był leko straszny. Niy wiedzołek do końca czy mie sie to spodobo ale jak żech zjechoł szolom do dziury, to już było piyknie i coroz to fajniyj. Piyrszy dziyń zlecioł w mig bo blank my chodzili coby poznać rejon .

A robisz jako wto? Jeżeś na przodku?
Jeżech rylym transportowym coby szło wytłumaczyć robia za ślepra. Niy niy jestech na przodku, niy robia z ringami jak „pyłojady”.

Czymu żeś wybroł tako robota, przeca łona je ciyżko i niebezpieczno.
Coby tradycji stało sie zadość, jak kożdy z mojij familiji.

Je na dole miyjsce na śmiych, czy raczyj ino powoga?
Cołko ta robota, człowiek se uświadamio, że jest 650 metrów pod ziymiom i trza se jakoś umilać tyn czas – ja, czynsto sie chichromy. Łopowiadomy se roztomajte szpetne wice i historie z życio wziynte.

fot. Maciek Pniak

A godcie tam po naszymu?
Coroz to mnij, ale czasym i ty „farbowane lisy” coś tam pedzom.

Poznoł żeś jakiś nowe ślonski słowa, kiere sie tyczom gruby?
Ja, loncetla to je taki piykny wyraz. Kożdy grubiorz wiy co to je a rozchodzi sie ło pasek z wypłaty :) Dalij sznupaka (tabaka) je w kożdyj tasi, coby se niuchnuńć, bo świyżego luftu je mało.

Jak by Ci przyszło łopedzieć jak je łobleczony grubiorz i jakich narzyndzi używo.
No dyć, że Wom powiym. Kożdy jedyn mo bacioki, onuce, galoty, hałer i jakoś jakla, a komu je zima to i kufaja biere.

Jaki som najprzyjymniyjsze klangi na grubie?
Jak sygnalista Ci pobijo na wyjazd i pitosz z dziury :)

Czego momy Ci winszować?
Szczyńść Boże! Tak winszujom se wszyjstki grubiorze!

Dziynkujymy za wywiad i winszujymy Ci coby kożdo szychta bezpiecznie i gibko Ci przeleciała. Szczyńść Boże!