fot. Amir Kuckovic

Kożdego dnia sprowiomy se moc rzeczy. Chlyb, miyso, kartofle abo inkszy grincojg. Wciepujymy do wózków we kaufhauzach kupa sprawunków. Downij mało co było, a terozki mogymy wrazić do epów wiela ino poradzymy udźwignońć. Tak to sie porobiło, że jedni sie mogom lajstnońć  co ino uwidzom, a drugim niy styknie ani do końca miesionca.

Zdarzo sie tyż,  że w portmanyju momy ino klepoki a muszymy coś kupić, coby mieć co jeść. I co wtedy? Niykierym zostowo dziwowanie sie bez szałfynster ale kiej trefiymy na dobrego czowieka, to nom do sprawunek na pomp, na heft, abo na krycha, jak to niykierzy godajom. A co to takigo?

To je inaczyj nazwa kredytu, łod kierego niy brało sie żodnego geltu. Jak sie coś potrzebowało a ni było czym zapłacić, to prosiło sie, coby to dać na pomp. I godało sie tyż, kiedy bydzie gelt i kiedy sie go łoddo. Jak sie już dostało wypłata abo pynzyjo to sie przychodziło, jak sie łobiecało. A jak zaś niy prziszło, to już drugi roz móg gyszefciorz nic tak niy dać.

I to wyglondało tak, że sprzedowaczka wyciongała spod lady heft i tam naszkryflała kiedy to było brane, co i za wiela.

Dzisio ło takim kredycie jako to w bankach dowajom raczyj by my niy pedzieli, że to je pomp. Szło go dostać ino u tego do kogo noleżoł gyszeft. Jak wto tam ino robił, to niy śmioł tak dować. I tyż ino w takich małych gyszeftach na osiedlu abo na wsi szło se tak co wzoś. I tyż niy kożdy go móg dostać. Rozchodziło sie  ło to, że tego kierego sie niy znało, niy dowało sie mu nic na pomp, bo niy wiedziało sie, czy łon to łoddo.

Zdo sie, że teroz już corozto ciynżyj je coś dostać na pomp a co dziepiyro w kaufhauzie, bo ta sprzedowaczka by to musiała ze swojij wypłaty zapłacić.

Downij to to był taki czynsty zwyczoj i to niy była żodno gańba brać na pomp. To było taki normalne. Niykierzy tak robili, chocioż se zapomnieli geltu. Terozki to sie już niy biere tak rzeczy bo to je gańba.

Idzie pedzieć ło ło takij osobie, kiero tak robi że łona żyje na pomp, to je że cołki życi ino na pożyczkach, pod kryskom.

Som wsie, kaj ludzie do teroz bierom tak rzeczy bo majom mało rynta i jim niy styko do nostympnej. Łoby ino nojmynij sie tak dzioło.