fot. Szymon Król

Dychnij sie – pedzieli. Dyć w to mi szpilej – pomyślůłch. Niy minyło wiela casu. Chyciůł’ech za rajzowo tasia i zacůn’ech podróżnicy rytuał. Ino kaj sam jechać? Hm… Azymut? Ledykaj. We wercie  coby kajś, kaj jesce mje niy bůło. Ekwipunek? Po piyrsze, taszyntuchy – wjycie, tak kejby co… Potym zamaszysty ruch rynkům i we ty łůny rajzowy lůnduje pora sznitek, kůncek lyjberwusztu, termos z kafejym i jaaa… moja uprzajůno citrůniada. Abo lyjmůniada… Sům jus niy wjym – ganc egal.

Z chałpy nad morze

Na placu hica. Dej pokój! A jo mům jesce wlyź do auta? I to bez klymy. Czaicie to? Eli hanysy to ponoć harde chopy. A jesce jo – tyn wzmocniůny górolskiym temperamyntym, wprost spod Babi Góry. Uff, dům se rady.

No to wio! Spod chałpy nad morze niy mům daleko – kajś kole 29 kilometrów. Godom Wom! Kali sie miyszkać we Piekarach Ślůnskich – Paniynka Piekarsko czuwo. I tak ubliżo drůgi.

Atmosfera bůła gorko. Zůł wi zůł myśl ło tym kaj jada dodowała mi skrzydeł kej adlerowi.

Górny Ślůnsk nad morzym

Łoziymdziesiůntkaósymka bůła blank průżno – kery z rania się dźwigo tego chlyb niy łodbiygo, a i cesty mo ino do sia. I tak łoto rajza nach morze zetrwała mje jakeś 40 minut. Pewno cis’ech łodrzutowcym, pomyślicie… Nic z tych rzecy. Ale fandzolić to – zurig na zad i do meritum sprowy.

Ujrzůłch Neptuna. Kaj? No dyć na morzu! No abo… Na kanale Glywickiym. I dejcie wiary co to tyn som łůn kery ceko na Wos we Gdańsku i na glywickiym rynku. Bo Górny Ślůnsk stoi nad morzym. A choćby i niy cołki, to aby te Glywice.

Mocka atrakcyjůw

Niy dowocie wiary? Prosto rzec – karnijcie sie na cesta Portowo 28 we Glywicach i chyćcie wiater we żagle. A na zicher ceko tam mocka atrakcyjůw. Bo tyn port to ńy ino gratka do prowdziwych wilków morskich. Kożdy z Wos może łostać członkym załogi. Możno niy piracki, ale zůł wi zůł bydziecie mieć kupa szpasu.

fot. Szymon Król

Idzie sie karnůńć choby do Amsterdamu eli Marsylje

A kaj idzie sie karnůńć? Gliwicko Marina mo kilka roztomajtych tras. Takich na dzionek, a dugszy. Dejmy na to, Ci kerzy przajům ftoszkom, na bank bydům radzi z rajzy do kolůnie kormoranów. Z tego rejsu zadowolyni bydom tys fani ślůnski myśli technologiczny. Skiż cego? A skiż tego, co po drůdze przepłynom bez dwie gryfne śluzy – Łabyndy i Dzierżno. Ino dejcie na nich pozůr i nie gibejcie sie za fest, coby keryś niy wpod do blank głymboki wody. Zaś zmiarkujecie – “ale tyn chop fandzoli!”. Toż niy! Dejcie wiary co różnica poziomów wody na ty w Dzierżnie mo aż 10 metrów z hokym. Co wkludzo jom na lista tych nojsrogszych w Polsce.  Na tako rajza nartychtujcie sie ze trzi godziny.

Padocie co za mało? No to dźwigać kotwica i ahoj fort do Koźlo! A kerymu jesce mało, a geldu zaforantowane mo pełne miechy, to możno i nach Amsterdam pociśnie, abo i do Marsylje? No to dować. Neptun jus ceko na byzuch!

A ło reszcie atrakcyjůw Wom jus szkryfloł niy byda. Bo to ino na forszpajza bůło. A po danie głůwne musicie porajzůwać sie sami. A dejcie wiary, co to miliůny we wercie! Naptun potwiyrdzo! A godůł’ech sniym!  Przi halb… Ekhm… No… Szczelyli my bruderszaft.