Mało wto wiy, że w piyrszej połowie dwudziestego storocza na Ślonsku a dokładnij w Katowicach był robiony gryfny motorcykel, abo jak niykierzy godajom motorad, gryfniejszy łod Harleya-Davidsona. Trzeja jymu poświyńcić kapka czasu, bo je czymu.

A mianowoł sie łon MOJ 130 i jego łojcym je Gustaw Michał Różycki. Pomogali mu zaś przi nim inż. Zuber i Łukasiewicz. Wszyjstki tajle do niego, ale bez kuglagrów i ket napyndowych były robione w Katowicach.

Niykierzy szpece godali, że MOJ był stokroć szykowniyjszy i mioł wiyncyj dinsków niźli motorcykle z Ameryki.

Godało sie ło nim jako ło maszinie festelnie piyknej z wielim reflektorym, kiery daleko poradził blyndować. A co nojważniyjsze, ważył niywiela wiyncyj jak tako fajno frela, bo ino 68 kg. Toż kiej kaj na drodze pod, co sie rzadko dzioło, to szło go wartko przyniyść do dom.

Polił ino 2 litry paliwa na 100 km. A nojwiyncył szło nim brusić 70 km na godzina. Toż jak sie pierzin rozfechtowoł to potym wygrywoł co kaj ino (W 1939 roku piyrsze miyjsce w III Rajdzie Tatrzańskim).

Ale to jeszcze niy wszyjstko. Szpasowoł łon wojokom – gońcom. I w 38 służył w Centrum Wyszkolenia Broni Pancernych w Modlinie. Toż niy ino dobrze wyglondoł ale i jeździł po rozmtomajtych wertepach.

Fest szkoda, że terozki sie już takich cudyniek sie niy robi, abo mało wto jich robi. I idzie sie ono ło takij rajzie na takim MOJU pomarzić.

Tekst powstoł na podstawie ksiożki „Ikony dizajnu w Województwie Śląskim”, kierej autorkom je Irma Kozina.
Wiyncyj tukyj: http://www.ikony.design-silesia.pl

Na zdjyńciu: Motorcykel MOJ 130, proj. Gustaw Michał Różycki, własn. firmy Fasing MOJ S.A., fot. K. Szewczyk.