fot.@superamit

Życi fest pryndko leci. Kożdy kajś sie śpiycho, kożdy za czymś loce. A to je tak jak w cugu. Im pryndzy tyn cug jedzie, tym sie myni widzi co je za łoknym. Wtedy je myni czasu, abo go ni ma wcale, coby poształnować, czy jedzie to wszyjstko w dobro strona.

Locymy za robotom, coby mieć wiyncyj geltu, a wygoda sie dla nos nojbardzij liczy. Fest to widać na dzieckach, kierym łojce chcom nieba przichylić, obciepujom je wszyjskim, chuchajom i dmuchajom, coby im włos z łepy niy spod.

Jak tak sie kożdy z nos rozglondnie kole siebie, abo to we familiji, czy kajś na placu, abo we inkszych miyjscach, to idzie sie kapnyć, że łone majom wszyjstko abo praje wszysko czego duszyczka zapragnie. W doma całe izby zaciśnione roztomańtymi graczkami, ajfony, ajpody, plejstejsze i inksze fanaberie.

Lonty yno markowe, no bo kaj by tyż łebek wyloz do szkoły abo na szpilplac w bele czym, toż to byłaby gańba.

Łojce dogodzajom jak idzie swoim pociechom, ale czyńścij od „dziynkuja” słyszom „Ola mo nowy mobilniok”, a „Jasio blank nowe dżinsy- jo tyż kca!”. No i co? I mamulka zacisko wargi i ciśnie z takim ofuczanym bajtlym do sklepu, coby kupić to, czego kce mały miałczek. Taki wybleczony przichodzi do dom, siado za komputerym, godzina, dwie, plecy mo coroz bardzij krziwe i tak dziyń za dniym.

Łojce, dziadki, krzestni kombinujom co swoim milusim dać, czy to na geburstag, abo na komunijo, żeby yno im dogodzić. Kedyś tak niy było. Kedyś dziecka zamiast przed komputerym siedzieć, cołki dziyń lotały na placu, synki grały we fusbal, dziołchy skokały w guma.

Żodyn nie był bachraty, bo co zjod to wyskokoł. Jedyn na drugigo niy zaglondoł jaki mo meszty, galoty i jaki mobilniok z tych galot wyciongo.

Kożdy sie radowoł z choćby małego gyszynku, kery starsi musieli we raji wystoć.

Niy rozchodzi sie ło to, coby porównywać jak je teroz, a jak było piyrwyj. Zdowo mi sie, że chodzi o refleksjo. Bydom pewnie tacy, co pedzom: przeca świat idzie z postympym i niy idzie łodstować. Możno i majom recht. Ino czy to je richtik taki fest postymp? Ocynić już musi kożdy z Wos z łosobna.