Fot. Cuentosdeunaimbecila

Jak to sie zaczło z tym dniym przonio?

Sztyrnostego lutego przipado dziyń świyntygo Walyntego. Jeszcze poranoście lot do zadku, był to normalny dziyń. Niczym sie niy różniył łod inkszych. Ale łod czasu, kedy do nos ciśnie sie kultura i nikere zwyczaje ze Zachodu, przyjon sie i tyn łobyczaj świyntowanio dnia tych, kierzy se przajom. Bo ło to sie chechle z tym Walyntym. Przilazło to do Polski ze Ameryki. Nikierzy kryncom nosym, że to ni ma nasz łobyczaj, że małpujymy choby jaki afy wszysko co yno idzie. Możno i majom w tym trocha rechtu, ale same świyntowani tego, że sie komuś przaje, ni ma przeca złe!

Co idzie dać

W tyn dziyń idzie łobdarować swoja frela abo swoigo istnego galana jakimś gyszynkiym. Kwiotki tyż som w modzie (tukyj ci co jich sprzedowajom zaciyrajom grabule, bo w żodyn inkszy dziyń tela geltu niy zarobiom). Idzie tyż iść razym do kina, na jaki fajf abo do jaki restauracje coby pogodać, pośmioć sie do sia, nazaglondać se głymboko w łoczy, potrzimać za rynka. Idzie zapolić tyż doma świyczki, zjeś razym jako wieczerzo, poprzitulać sie, dać se kuska… i tu sie dali niy rozwijom. Ludzie tak w tyn dziyń robiom.

Wysyłani kartek

Fest tyż je modne wysyłani kartek w kerych pisze sie taki od sia zapewniynia ło przoniu po truła. Nikierzy som deczko zgniyli. Ci wysyłajom kartki w kerych je już wszyjstko napisane. Łoni podpisujom sie yno „twój dzióbek” i szlus. Ty kartki majom tyż jeszcze jedyn plus. Jak kery je fest gańbliwy coby pedzieć komuś, że mu przaje, to może wysłać bez swoigo handszkryfa, abo tak napisać coby trocha nakerować, że to je łod niego, łod nij. Tyn co tako kartka dostowo, ształnuje łod kogo prziszła. A tyn co jom wysłoł je fest rod, że sie łopowożył zrobić mały krok coby sie już wiyncyj niy gańbować.

Przoni w kożdy dziyń

Wszyjstki te łoznaki łoddanio i przonio som fest fajne i romantyczne. I tak mo być miyndzy ludziskami. Nojważniyjsze je w tym wszyskim to, żeby se taki przoni, taki łoddani łokazywać w kożdy dziyń a niy ino we połowie lutego.