fot. rolleh

No toż zaczły się hyce!. Ci, co pojadom dychnyć i to niyważne kaj, fest sie z takigo zapowiadanio radujom. Gorszy majom ci, co zostajom w chałpach, chodzom do roboty i sie w ancugach, klajdach i arbajach parzom. Wszyscy ształnujom jako tymu zaradzić abo przinajmi trocha złonaczyć tyn hyc, żeby dało sie fongować.

Klimy i propelery 

W ruch idom roztomańte propelery, klimy fiuchajom, fachlujom sie papiorami. Spijo sie woda hektolitrami. Jeś sie bardzo niy kce, bo komu w takim hycu szamać sie kce. Jak sie już robota skończy i pódzie sie do dom, bydzie sie mijać roztomańte krzikopy, stawy, fontanny. Som widok wody bydzie nos deczko chłodzić ale tyż gorszyć. Bo nojchyntni skoczylibymy do tyj krzipopy i to w tym ancugu! Bez seblykanio! Trzeja zazdrościć bajtlom w miastach, kere szpilujom we fontannach. Godajom, że to je groźne, że tam som jakiś bakteryje i do tej wody lepszy nie wlazować. Kery by na to dowoł pozor jak z dekla paruje! Bo co je gorsze? Jako wancka, kero zacznie po nas deptać czy zawrany organizm? To se już musicie sami łocynić.

Zimno brauza

Jakimś wyjściym je wlazowani w doma co jakiś czas pod brauza. Pamiyntejcie, żeby pod zimno wodno dusza nie wlazować rozchajcowanym! Plompka może tego nie zdzierżeć! Hercszlag na zicher! Pomału, najprzod pod letnio woda i se po trochu zimnej popuszczać. A po takim kompaniu, nojlepszy wylyź z badcimru, bez wyciyranio siednyć se kaj abo legnyć, zanknyć łoczy i se w wyobraźni przeniyś tam, kaj deptajom biołe bery. Bydzie nom o długo dłuży chłodno. To działo! Wiyrzcie mi. Nie na darmo nojbardzi znane filozofy i psychologi godajom, że wyobraźnia to potynga!