fot. Piotr Sobczak

Trzimiymy w rynkach niydowno nagrano płyta, na kierej som ślonski konski w nowym wykonaniu. Jeji prowodirym je chop ze Żor – Adam Oleś.

Nadoł ji łon miano „hurdu_hurdu”, co po polsku znaczy husiu husiu. A jak kożdy wiy, husio sie bajtle, coby nynały :) I to kolybani je piyrszym motywym na tyj płycie. Ja, ino niy myślcie, że łona je ino, coby gibko usnyć, niy niy, łona poradzi tyż postawić czowieka na nogi.

Co czowieka tukyj chyto, to to że łokładka płyty, je łobleczono w modry materiał z kierego som szyte ślonski zopaski.

Ale nojważniyjsze je to, że je z tym co nasze, swojski, czyli z pieśniami, kiere były śpiywane przez naszych prałojców. A idzie trefić do nich gibko. Styknie ino pogodać z  poroma kobiytami, kiere ty konski znajom i śpiywajom na konkursowych binach. I tak było tym razym. Radostowianki kole Pszczyny, pedziały „ja”. Łotwarły sie na ukustyczne brzmiyni instrumyntów i aranżacje, kiere teroz som na czasie.

Ja, ja, świat idzie do przodku, a ło to co stare trzeja sie starać. Toż zdo sie, że taki grani je dobrym sposobym na to, coby za sto lot znały go tyż nasze bajtle.  A bydom dziynki tym muzykantom:

• Dominika Kontny – śpiyw
• Adam Oleś – wiolonczela, piano
• Tomasz Kałwak – instrumynty klawiszowe, sound design
• Damian Kurasz – gitara
• Radosłwa Nowicki – saksofon
• Sławomir Berny – perkusjonalia
• Zespół Radostowianki pod kierownictwym Jadwigi Masny

Płyta ukozała sie nakładym ślonskigo wydawnictwa Falami (http://www.falami.pl/).

Wiyncyj znojdziecie na http://www.adamoles.pl/ abo na jich facebookowyj zajcie.