fot. Helico

Zima za pasym, a jak sie ciśnie przez futrziny zimny luft, to je znak, że trza hajcować.

Ściepowani wonglo

Ci, co majom wiyncy geltu, to yno nacisnom na knefel i czy to je gaz, czy sztrom, czy tyż łolyj, zarozki majom doma chyc. Ale wiynkszość ludzi poli doma wonglym (mułym, abo tyż flotym). Tego to piyrsze, jak sie go już na grubie kupi i jak go szofer prziwiezie, trza do pywnice ściepać. Trocha  sie przi tej robocie chop musi namachać i dobrze jak sie zno taki knif, że jak nabiyro sie wongiel na łopata to trza go brać cołki czas łod zole. Wtedy sie łatwi nabiyro na nia i gibci ściepuje do fynsterka.

Skłodani łognia

Jak już łon je we pywnicy, bierymy sie za skłodani łognia. Papior i pociupane drewka trza piyrsze na ruszta ułożyć, no i mogymy zapolać. Jak sie drzewo chyci to idzie pora łopat wciepnyć. Nie two to długo, żeby wongiel sie fest chyciył. Jak piec zaczyno „godać”, to pomału idzie zamykać dolnio fortka, żeby cały chyc nie szoł do komina. Tak co pora godzin doglondomy czy czasym nie trza dołożyc, posztorać łod dołu, abo tyż wybrać hasie z popielnika. Hasie (no abo hasi) trza potym wynosić abo do kubła abo do hasioka.

Jak widzicie z hajcowaniym trocha roboty je. I je ona deczko „umazano”. No ale coś za coś. Abo wygoda i myni geltu w portomlu, abo zmazane pazury i deptani do pywnice.

Inksze knify

Powiym Wom jeszcze, że zaczyno być modne skłodani fojery w piecu „łod wiyrchu”. Robi sie to tak: do pieca laduje sie fol wonglo, tela wiela wlezie, a ogiyń zapolo sie na wierchu tej kupki czornych brył. Jedni by padali, że sie to nie hajcnie. Ni majom rechtu! Hajcnie sie. W takim polyniu łod wiyrchu rozchodzi sie ło to, że nie kurzi sie za wiela z komina, bo cołki kurz i sadze spolajom sie we tym łogniu, przez kierego muszom „przelecieć” niż wpadnom do przewodow kominowych. Je to bardzi ekologiczne polyni w piecu i godajom, że łoszczyndniyjsze (dłuży sie poli, nie trza deptać wcale do pywnice, komina nie trza tela pucować i dokładni sie wongiel spalo). Tyn sposób je przez moigo fotra sprawdzony. Wy tyż spróbujcie!