Gumiklyjzy Food Truck – wywiad

fot. Szymon Król
fot. Szymon Król


Godomy z Tymkiem  z  foodtrucku Gumiklyjzy, kiery podowo tradycyjno ślonsko kuchnia w nowoczesnym wydaniu!  Drugigo takigo niy treficie nikaj! 

1. Skond sie wzion pomysł na ślonsko kuchnia w foodtruckowym wydaniu? Powiedzcie nom coś ło sobie!

Łod poru lot chciołech mieć food trucka, fest przaja warzyniu, yno niy było mie stać na restauracyjo, toż to rozwiązani było dlo mie idealne. Jako że niy chciołech sprzedować frytek, zapiekanek eli hamburgerów, postawiłech na oryginalno kuchnia, w oryginalnym aucie!A jako to bydzie kuchnia, to boła nojszybszo decyzjo – w tyn czos jak zaczołech sie zastanawiać to genau podowołech do stołu gumiklyjzy z roladom i modrom kapustom. W tyn sposób postawiłech na gumiklyjzy, a robia je z przepisu łod mamulki, kiero miała go łod starki – som ślonski i fest smaczne!

2. Je to możne, coby se Wos zamówić pod chałpa, kiej sie niy mo chynci warzyć w niydziela łobiodu?

Zawdy je szansa – yno to musiołby być fest srogi familijny łobiod, abo jako impreza okolicznościowo, coby sie to opłacało nom, jak i klientom! Na tyn przykład jaki srogi Gyburstag!

3. Prziszła do Wos na łobiod jako Oma, kiero późniyj wynokwiała że to niy ma uwarzone jak u nij w chałpie? Mocie jakie śmiyszne historie w robocie?

Kiedyś prziszła do nos Pani, kiero na wstympie padała “Jo robia nojlepsze kluski ślonskie i tego nic niy zmiyni, ale dom Wom szansa, cobyście mogli sie zbliżyć do mojich gumiklyjzów” i zamówiła jedna porcja. Kiej zjadła, prziszła do okienka i wymownie z cmokniyńciym padała yno “Maestro!”;)  Momy moc klientów od kierych słyszymy, że som “takie jak robiła babcia!” (abo mamulka, teściowo) abo że lepsze :)  To sprawio, że je nom cieplyj na syrcu, a i wiymy że naszo misja mo syns!  Jedyn roz prziszła tyż cołko familija z bajtlami i starzikami. Gowa rodziny pado na wstympie “klusek mojij teściowyj niy pobijom żodne! Kiej zjedli, podeszli pochwolić kluski, a pan pado “Pyszne – ale mamusia robi lepsze!” :) Niy minyło 5 minut, kaj przybiegł som i pedzioł że niy chcioł podpaść teściowyj, ale musi pedzieć – nasze kluski były lepsze! ;) 

 

fot. Szymon Król
fot. Szymon Król

 

4. Jaki je Wasze nojlepsze, popisowe danie?

Ciynżko odpowiedzieć na to pytani! Kożdy mo swoijgo faworyta! Jo na przikład fest przaja “Cebulowymu Mistrzowi” z sosym cwiblowym, skwarkami i cwiblom dymkom, a Kamila (kamratka w żywobyciu i robocie) przaje wyżyj już opisanymu “Kyjzowymu Miszungowi” z jednom yno modyfikacjom, dodowo do niygo skwarki! Klienci nojczynściyj bierom “Targanygo Wieprzka”, z szarpanom wieprzowinom, sosem z tomatowo – paprykowym i ogórkami konserwowymi z chilli. Kiej miołbych postawić na yno jedna propozycja to pedziołbych “No to klops”, kiery schodzi nom praktycznie zawdy. Robota robiom w nim małe karminadle w sosie śmietanowym na ostrym zymfcie i bulionie wołowym warzonym 7 godzin, jako dodatek dodowomy marchewka, a na wierch zielono pietruszka! No i je jeszcze klasyk! Kiery robimy w wersji limitowanyj – rolada z modrom kapustom! Od tradycyjnygo ślonskigo łobiadu różni sie tym, że niy mo formy rolady, yno gulaszu, a w smaku je tako jak oryginał!

5. Ludzie z inkszych województw radzi jedzom kluski z roladom i modrom kapustom? Eli lepij sie Wom biznes kulo u nos na Ślonsku?

Z żalem musza pedzieć, że lepij sie sprzedowajom poza Ślonskiym. U nos fest czynsto ludzie godajom “aaa kluski to jo Ci w chałpie zrobia!” i ciśnie do kolejki po frytki abo zapiekanka… poza Ślonskiym som my egzotycznym food truckiem, kierego ludzie som ciekawi. Je jeszcze kwestia ślonskich emigrantów, w Krakowie je ich fest dużo i z zawdy czekajom, kiej sie yno pokożymy.

6. Piszecie na swoij zajcie że warzycie ślonsko kuchna w nowoczesnym wydaniu,  jak żeście zmiynili tradycyjno ślonsko kuchnia?

Nowoczesne wydanie polego na samyj formie klusek w wersji street foodowyj, podowanyj w kofliczkach, coby można było je wziońć i wszamać “po drodze”.  Nojwiynkszom nowinkom som dodatki, kiere niy som na co dziyń dodowane do gumiklyjzów. Na tyn przikład sos z kyjzy z rukolom, orzechami włoskimi, oliwom z oliwek i świyżo mielonym ziylonym pieprzem. 

7. U nos w gyszeftach Gryfnie, zawdy do klientów godomy po ślonsku, a jak to u Wos wyglondo?

W trucku mówimy i godomy :) Wszyjstko zależy łod regionu i łod klienta! Poza Ślonskiym kiej nos w to poprosi to godomy, bo czynsto nos po prostu niy rozumiom :D 

Tekst:
Szymon Król

Co byś na to pedzioł?

fot. Szymon Król

Skond sie wziyna heksa

Mo czorne, rozkopane wosy i czorne łoczy, kere po cimoku śwjycom choby byrny abo gwjozdy? Loto na mietle?  Niy! Bo heksa to już ni ma ta sama heksa, jak sie jom downij ludzie forsztelowali i boli sie heksy jak łognio.  Heksa  – poradzi niy tela czarować, co łoczarować – paradzi smjyniać ludzi. Mono w lepszych.

WIYNCYJ »

fot. Radosław Kaźmierczak

Swojski buchty

Tyn, kierego bawiła starka w doma zawdy zno smak prawdziwych buchtów. Som jeszcze buchty, kiere sie pamiynto z przedszkola. Ale to niy było to samo, co wyrobiane w doma przez stareczka i z wielkigo przonio.

WIYNCYJ »