fot. London Public Library

Naśladowanie zachowań dorosłych łodbijało się w zabawach bajtli. Myśla, że ni ma takij dziołchy, kiero by za czasów młodości niy bawiła się w dom i niy kleiła z ziymi karminadli abo troszka późnij jak jo hamburgerów, kere przekłodałach wielkimi listkami. Abo wto niy bawił się w sklep? Niy było jako to teroz dostępnych produktów. Ło tym wspomino nasza fanka:

„Dziołchy bawiyli się w sklep a towor boł ze pustych łopakowań po pudingach a magiwyrfle jak my wpieprzali az wargi boły biołe…”.

Dlo bajtli był ino plac, czasym trocha piochu i nic więcej i łone same musiały ruszyć głową i się zabawić. A w co? Ło tym nasza kamratka:

„Po kapslach to aż paluchy bolały : ) podchody, guma, na trzepaku, na kole się jeździło w koło bloku, zomki z piochu koniecznie z fosą i podkopem, skokało się z huśtawki… no i  w zima zjyżdżali na żiciach w nylonbojtlach a latym nojlepij lotało sie na hołda abo na wierżisku łaziło sie po bunkrach„.

Na kożdym placu łobserwowało się tyż bajtli, kere skokały w guma. W ta zabawa bawiły się dziołchy. Nojwiększo trudność, była jak te, kere trzymały guma dźwigały ją wyżyj. To było coś, tak wysoko podskoczyć.

W grziba abo w klasy grały dziecka myjsze, od 5 roku życia. Rysowało się kwadraty od 1-10 abo do 12 i linia startu. Zaczynało się od rzutu kamiyniym w piyrszy kwadrat. Trzeja było tak ciepnąć, coby kamień niy wylecioł z pola. Potym przeskoczyć przez ty pole z kamiyniym i skokać po kolejnych polach, a potym się wrócić i w drodze powrotnyj wziąć kamień. Potym ciepnyć go na drugi pole i zaś przy skokaniu go minyć.

Ale nojczęścij bawiło się w szukanego abo jak niykierzy godają w chowanego:

„A jo by poskoła se w guma, abo w szukanego, ja to było ,jak my rajzowali po byszoungach, kule mojo gryfno mo 10 lot i niy wiy co to gonitwa, bo miyszko w Slough, tukej niy wychodzom na plac, 78 mieszkań i CIUL żodnyj huśtawki „.

Gra w chowanego miała tyż inksze warianty. Ło jednym z nich czyli ło grze w pucha wspomino Pan Marcel:

„Umisz groć w chowanego, to umisz groć w pucha, ino żeby sie zaklepać musiołś kopnąć w bala i wybawić karlusów”.

Jednym z tych wariantów jest tyż gra w dziesięć patyków. Zasady tej gry są taki same jak w chowanego ino, że na początku trzeja wybić w luft 10 patyków, kere są poukłodane na desce a ta deska leży na kuloku. Potym trzeja te rozciepane patyki pozbiyrać i zaś położyć na deska i dziepiyro szukać. Ale tyż wtoś móg za krzoków wylecieć i zaś rozciepać ty patyki.

Tą łostatnią grą kończymy nasz artykuł i zapraszomy na część trzecio. Pyrsk!