fot. Greg Raines

Chned dziyń frelek, babów i dziołchów. Trzeja jim bydzie sprawić jaki bombony, szokulada abo tulpy. Wzoś na jako kawa, abo do tyjatru i podziynkować za to, że som. Bo powiydzcie sami, coby te chopy bez nich zrobili?

Niy było by bajtli

Po piyrsze, kiejby niy łony niy było by bajtli! Kaj tam by chop poradził bez 9 miesiyncy lotać z takim wielim brzuchym i potym wyciś to małe zoszutko. Pryndzyj by chop kipnył. Do tego som stworzone ino baby.

Chopom by sie ale mierzło

Po drugi, chopom by sie fest mierzło, bo niy mieliby sie do kogo łodezwać, na kogo wydrzeć pyska, a potym dać kusika i przeprosić, że sie za fest larmowali. A jak sie chopom i tak mierznie, to styknie ich ino wzoś do jakigo gyszeftu, to bydom mieć cołki dziyń zajynty, a potym jeszcze do tego prozny bajtlik.

Wto nojlepij warzi?

Po trzeci, chopy poradzom na prowda dobrze uwarzić, ale wiycie, jednak baby zrobiom to lepij. Dejmy na to taki szałot abo tako rolada – no niebo w gymbie!

Niy ma lekko być piyknym!

A wiela ty frelki sie muszom nastarać. Łazić na tych wielich kromflekach, coby szłapa lepij wyglondała i coby być troszka wiynkszym. Kupować ty roztomajte lipynsztifty, mazidła i ty inksze, coby piyknij wyglondać, niż som. Lotać, na ty roztomajte spa, szkubać se brwi a potym jich jeszcze szmarować na czorno. Klejić pazurska, kiere tak zawodzajom. A przeca w nocy i tak nic niy widać, bo je cimok.

Frelka je jak kwiotek

No, ale piyknij je na świecie z frelkami. Bo jak tako jedna łoblecze fajny spodek abo klajd, to sie chopom mandle w łoczach pokazujom. Chocioż som tyż taki, co w galociskach łażom, ale takim tyż trza przoć!

Baby cołki dziyń poradzom przed pełnym szrankiym stoć, a i tak niy majom sie w co łoblyc. I jak tu tako spokopić. Powiydzcie sami, czego ty dziołchy niy robiom. A niy muszom, pra!