Fof. Andrew Edwards Photography

Kożdy z nos je inkszy. Tela wiela je ludzi, tela je różnic. Kożdy je inkszy i tego sie niy idzie wyprzyć abo przez to gańbować. Ale som my podzielyni na baby i chopy. A jedni łod drugich sie pieruńsko różniom!

Chop, choby niy wiym jak kcioł, niy zrozumi tego, co robiom, ło czym myślom, na co dowajom pozór baby. Piyrszy przikład z ranta: kery chop pamiynto, jako był jego kamrat łobleczony na jakim fajerze… trzi lata tymu? Żodyn. Powiym wiyncy- chop niy wiy, w co sie łodzioł wczorej, bo ło tym ani niy rozważuje.

A baba? „Jo w takim klajdzie niy póda do Gustle na geburstag, boch w nij była już dwa lata tymu u jij cery na komuniji”. Tak sie kończy ta obserwacjo: „Wto jak wyszykowany, jaki miała zauśniczki i jaki strzewiki”.

Bezmała baba tyż zdecydowani wiyncy godo łod chopa. Że rozciongo kożdy problym, kożde rozprawiani jak gumin z batków. Możno tak i je. Ale to chyba zależy ło czym sie godo. Ło modzie, ło dzieckach abo ło tym „co u Hildy”, baby poradzom przegodać cołki do połednia.

A chopy ni? Chopy tyż! Yno, że ło czym inkszym. Auta, kery wiela poli, jaki mo gaz i kere sie niy psujom, abo fusbal. Lewandowski szczelył ta brama lewom nogom we prawy róg bramy, a „polył” conajmi meter. Ja, ja… to je tyn sławny „spalony”. Rozgodać babie co to je spalony we fusbalu (o hokeju lepszy niy wspominać) to je tak jakby po bosoku i yno w batkach wylyź na Mount Everest i to bez zima! Sprawa niy do przyjścio. I chop niy wiy czymu łona nie rozumi taki prostej sprawy.

A barwy? Jeżech ciekawo wiela chopów wiy jako to je barwa amarantowo abo zgnito zielyń. Piynć? Dziesiyńć procynt? Możno ani tela. Bo tu zaś sie roachodzi ło przywionzywani do czegoś wagi abo ni.

Sami dobrze wiycie, że tych różnic miyndzy babami a chopami je moc. Ale jak to uczone, mondre gowy tego świata godajom: „Ładunki różnoimiynne sie prziciongajom”. I dziynkować Pónbóczkowi! Wiycie jakby sie nom mierzło jakby my byli tacy sami? Pieronym!