Niydowno poru ślonskich gryfnioków zrychtowało fest fajno antologia komiksu, kierej dali miano „Fest”.

Łokludzo łona po downym Ślonsku, po tym teroz i po tym, kiery bydzie za sto lot abo i wiyncyj. Rozprowio ło tym, co w gowach majom Ślonzoki, co jich tropi i raduje. Poradzi wyynklarować to, ło co sie durś ino ludzie pytajom i żodyn niy poradzi jim tego wytublikować.

Je tyż w nij pora komiksów po naszymu. A ło jednym z nich my już pryndzyj pisali. Pamiyntocie „W kosmosie nikt, nie usłyszy jak godosz”?

„Fest” idzie se sprawić w komiksowych gyszeftach. Dejmy na to w Katowicach w http://www.imago.com.pl/ abo jeszcze w Gildii: http://www.sklep.gildia.pl/komiksy

Tukyj pokazujymy pora łobrozków:

A teroz dejcie pozór! Momy do Wos konkurs!

• Co trzeja zrobić? Trzeja napisać po naszymu krótki tekst, do kierego poźnij bydzie szło narysować pora łobrozków. Tak jak byście łonaczyli tekst do krótkigo komiksu, ino że po ślonsku.
• Ło czym to mo być i wiela tego mo być? Ni ma pedziane. To je zależne łod Wos.
• Kaj to posłać? Proszymy ło przysyłani tych tekstów na [email protected]
• Wiela mocie czasu? Do poniedziałku (27 moja 2013) do 12:00 w połednie.
• Co idzie dostać? Komiks Fest (dlo dwóch osób)

Toż winszujymy powodzynio! Chowcie sie! Pyrsk!