fot. gryfnie

Wybrali my sie na bysuch do ślonskigo folklorysty i bojszowioka Pana Alojzego Lysko.

Je to chop, kiery fest przaje naszyj Ziymi.
To wszysko, co mo we syrcu przelywo tyż na papiór. Pisze ksiożki ło Ślonsku, Ślonzokach, tradycjach, ale tyż bojki. A wszysko to je po naszymu.

Pan Alojzy zbiyro ślonski słowa.

To tak ni ma, że słowa przyłażom tak gibko na myśl. Czasym sie coś godo i sie powiy słowo, kierego sie już niy używo. A jak Ci wtoś powiy cożeś to pedzioł, to już ni mosz szans, coby to pedzieć jeszcze roz. Co sie wdycki robi?

Pan Alojzy biere mało karteczka i drabko zapisuje co usłyszoł. A potym wkłodo ta karteczka do kapsy. A potym przekłodo do ksiożki, kaj je reszta słów. Kożde taki łodkryci biere jako łogromno uciecha.

Nom pedzioł ino pora słów, kierych mo tak po prowdzie mocka.

Piyrsze śnich to „flegować” czyli łodpoczywać po ciyżkij szychcie. To je łokreślyni, kiery mo rod kożdy. Terozki niykierzy padajom, że majom „fajrant”.

Drugim słowym je „ćwinka”. Pan Alojzy za przikłod użycia tego słowa podoł nom taki zdani: Nasza krowa sie już wyprawiła, już żuje ćwinka. Jak my sie dowiedzieli, że rozchodzi sie tukyj ło to, że krowa idzie już dojić.

Trzecim słowym, ło kierym my rozprowiali je „pobaba”. Pobaba to je tako uczta po skończonych żniwach abo wykopkach. Brało sie dycki wszystkich, kierzy pomogali na poczynstunek. Loła sie tyż gorzołka.

I słowym, kiere my zakończyli nasze rozważanio było „ziajo mi sie ziajo” co znaczy, że gymbulka mi sie niy zawiyro, ziywo mi sie.

Toż widzicie wiela jeszcze momy piyknych słów, kiere czasym sie nom spomnom jak rozprowiomy. Powia Wom szczyrze, że jo tyż tak zaczłach robić, jak Pan Alojzy. Zapisuja kożde niyznane przezy mie słowo. Możno Wy tyż tak róbcie?

Zabraszomy do przesyłania Waszych ślonskich słów, kiere żeście niydowno usłyszeli, abo pedzieli, na naszo krzinka mailowo: [email protected]

Napiszcie jeszcze czymu to słowo żeście wybrali i wto go użył i kaj.

Chowcie sie!