Żur żyniaty
Prziłazisz z tyj zimnicy, rynce łoziombniynte, lica czyrwone, mosz dyrgówki i zagrzołbyś sie czym gorkim? Na to nojlepszy je gor żuru żyniatego! Ku tymu jeszcze gorko żymła i wiysz że żyjesz. I niywiela potrzeja ku tymu. Toż worzcie i grzyjcie sie.
Co nom bydzie potrzeja
- 50 dag wyndzonki
- 50 dag żeberek uwyndzonych
- 2 szklonki zakwasu
- 5-6 srogich kartofli
- 2 zombki knoblauchu
- pół cebuli
- majeranek
- sól i pieprz
Jak to sie robi:
- Nojprzód warzymy wywar. Do tego potrzebne som ty żeberka i pół tyj wyndzonki. Zalywomy to wodom, tak kajś z pół gorka i warzymy tak do godziny. Tukyj werci sie tyż ciepnyć majeranku, liść bobkowy i zieli angielski. Niych se to tak pyko przykryte pokrywkom. Ino coby niy wykipiało. Toż tyż niy na za wielim łogniu.
- Reszta tyj wyndzonki pokroć w drobno kosteczka i zeskwarzić z cebulkom i knoblauchym.
- Kartofle łoszkrobać i pokroć w tako fajno rowno kostka.
- Jak sie tyn wywar bydzie warził, to rajn ku niymu trzeja dociepać ty kartofle, a ta wyndzonka wyciongnyć i pokroć.
- Ło to sie rozchodzi, w tym żurze żyniatym, że kartofle warzom sie pospołu z tym żurym a niy same w osobnym gornku.
- Jak ty kartofle zmiynknom, tak kajś za 15 min, dowomy ty skwarki jedne z wywaru pokrote a drugi zeskworzone i wlywomy tyn zakwas na żur. Musi sie to zawarzić. (pobulkać)
- Na końcu prziprawić solom i pieprzym, wiela bydzie Wom brakowało. I idzie jeść!
- Werci sie tyż jeszcze dać słodkij krymówki, na som koniec, kiej tyn żur bydom jadły bajtle, abo kiej je fest kważny, to tyż bo wdycki bydzie taki lżyjszy i słodszy.
Teroz jeszcze dejcie se pozór na som zakwas:
Nojgorszy je kupny, no chyba że sie trefi taki bez łoctu, abo niy wiadomo jakich gehojzów. Beztóż kiej ni mocie czasu, abo mocie a Wom sie niy chce go robić, to nojlepi je lecieć na torg. Bo je nadzieja, że tyn wto go tam robił, narychtowoł go tak, jak sie noleży, pra.
Ty maszkety, kiere tukyj momy pokozane na łobrozkach, uwarziło dlo nos Pole do popisu. To je katowicko ekstra kuchnia w kierej nauczom Cie warzić tak, że żodyn Ci niy powiy że mu niy smakuje a ino bydzie jod aż mu sie bydom uszy trzyńść. Zapraszomy na http://poledopopisu.pl
Co byś na to pedzioł?