Zista - Warzyni - gryfnie

Zista

fot. Iwona Łach
fot. Iwona Łach

Na niedziela, na beztydziyń, na świynta, ku kafyjowi i tyjowi. Zista je dobro na wszystko. Roztomańte som zisty – cołki biołe, cołki kakaowe, miyszane – czyli zebry, drożdżowe abo uciyrane. Do zisty idzie ciepnyć skóra z apluzyny, jaki orzech abo marmulada. Z czym jom nie zrobisz, to i tak bydzie dobro. Dej yno pozór, coby ci nie wyszoł zakalec.

Co nom bydzie trza do zisty?

  • 120 g masła
  • 230 g biołej mąki
  • 170 g cukru
  • 1 i 1/2 łyżyczki bakpulwru
  • 1/2 łyżyczki sody
  • 1/2 szolki mlyka
  • 1/3 szolki kwaśnej śmiytonki (12% abo 18%)
  • 2 jajca
  • 2 łyżki gorskigo kakao
  • skóra z apluzyny abo zitrony
  • 8 łyżek wody

Jak sie to robi?

  1. Wpiyrw wyciongomy masło, żeby nom zmiynkło. Z zimnym masłym to tu nic nie poradzisz.

  2. W kochliku miyszomy woda z kakao i dowomy to na chwila na ogiyń, coby nom to zabulkało. Łodstawiomy z ognia, żeby ochłodło.

  3. Sztalujymy bratruła na 180 stopni i szmarujymy keksówka abo forymka do zisty masłym i wysypujymy tartom bułkom abo grysikiym.

  4. Bierymy trzi miski – mało, wielko i ganc wielko. W tej małej miyszomy mlyko ze śmiytonkom. Na tej średnij wiyszomy cedzitko i przesiywomy do nij mąka z 1 łyżyczkom proszku i 1/2 łyżyczki sody.

  5. W tej ganc wielkij uciyromy masło z cukrym na jednolito masa. Potym dociepujymy jedne jajco i fyrlomy dalij. Potym dociepujymy drugi jajco i dalij fyrlomy. Potym dociepujymy połowa z tego mlyka ze śmiytonkom, fyrlomy, dociepujymy połowa mąki, cołki czas fyrlomy. Dociepujymy reszta mlyka ze śmiytonkom, fyrlomy, reszta mąki i fyrlomy. Dużo tego fyrlanio, jo wiym, no ale trza sie trocha namachać, żeby mieć dobro zista.

  6. Jak już to momy ufyrlane, to dzielymy ciasto na dwie czyńści -1/4 odlywomy do mniyjszej miski, a do reszty ściyromy skóra z apluzyny. Wlywomy trocha do forymki, tak żeby nom przikryło dno, ale żeby jeszcze trocha w misce zostało.

  7. W tej myńszej misce trza zrobić ciasto kakaowe, beztóż dolywomy do tego ciasta te nasze ochłodnyte kakao i dodowomy jeszcze pół łyżyczki proszku do pieczynio (bo kakaowe ciasto je ciynżki i moge być zakalcowate). Fyrlomy aż sie wymiyszo, i wlywomy do forymki – robiymy taki kakaowe szmaje. Potym wlywomy reszta biołego ciasta na wiyrch i dowomy to do bratruły na 50 minut.

  8. Trza tego wachować, coby sie nie spolyło. Jak kto mo fest srogo bratruła, to sie to moge upiyc pryndzyj, beztoż trza kukać i dziabnyć zista wykałaczkom, coby sprawdzić, czy sie już upiykła. Jak już nasza zista je gotowo, to odstawiomy jom w tej blaszce na bok, żeby nom ochłodła. Jak już bydzie ganc zimno, to wyciongomy jom z forymki, krejymy i dowomy na stół.

Zista je dobro na wszystko!

  • 02.11.2014

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.