Wegański żymloki
Razym z frelom z bloga Zielenina zrychtowali my konkurs na ślonski wegański maszket. Były kołocze, szpajzy i żury, ale nojwiynkszo uciecha sprawił nom przepis na żymloka. I to jakigo?
Narychtowany przez Anna Mateja, zwyciyńżczyni konkursu.
Toż czytejcie, warzcie i maszkećcie!
U mje w doma chopy godajom, że z maszketow to najbardziej lubią schabowego abo rolada. Dlatego se pomyślałach, że jak slodkich maszketów nie chcą, a rolady im nie zrobia, to dostaną gizdy po żymloku. Łatwo powiedzieć „po żymloku”, jak mje cały talyrz wmócili. Jak mojemu fatrowi tak te żymloki smakują, to niech i inni se zrobio i skosztujo.
Skład:
- 200 gramów czerwonej soczewicy
- 100 gramów tartej żymły(bułki)
- 50 gramów pieczarek
- 2 opakowania papieru ryżowego
- 1 łyżeczka słodkiej papryki
- 1 łyżeczka majeranku
- pieprz do smaku
- sól do smaku
- olej
- Najprzód trza uwarzyć soczewica, tak co by se roslatywała i zostało jak namyni wody. Jak soczewica se bydzie warzyć, trza potrzyć i usmarzyć pieczarki.
- Żymła namoczyć we wodzie( jakeś 100 mililitrów styknie).
- Poczekać chwila, aż soczewica i pieczarki ostygnom.
- Wciepnyć wszytko do miski i powygniotać.
- Dociepnyć przyprawy (majeranek, papryka, pieprz i sól)
- Pyndzlam mazać papiór ryżowy wodą, aż namięknie. Na każde kółko dać kole kupowatej łyżki farszu (jak kto chce, może dać wińcyj).
- Żymloki zwijać jak długie krokiety (najpierw dwa naprzeciwległe boki do środka, a potem pokulać, aż se zrobi rulon).
- Takie żymloki usmażyć na złoto na oleju.
Uwagi:
Żymloki przy smażeniu mogom trocha popynkać, jak takie zwykłe nie wegańskie, ale daje im to ino charakteru swojskiego żymloka.
Najlepiej je podawać ze swojsko tomatom, kiszonym ogórkiem i musztardą.
Gratulujymy pomysłu i zabiyromy sie do roboty. Pyrsk!
A wiyncyj ło konkursie poczytocie na blogu łod Zieleniny.
Co byś na to pedzioł?