fot. Iwona Łach

Świynta to taki czas, kiej se idzie pojeś moc maszketów, kierych sie nie warzi bez reszta roku. Jednym z tych maszketów je moczka, na kierom niykierzy godajom zupa z piernika. Bez moczki ni ma co godać o świyntach, koniec kropka. U nos w chałpie sie zawsze warzi tego cołki kesel we wilijo, a traci sie to gibcij niż piniondze z komunije. Beztoż na sylwestra przeważnie sie dorabio drugi kesel, coby se tyż móc trocha zjeś w nowym roku.

Nojważniyjszy w moczce je piernik od piykorza. Dobry piernik to je taki, kiery mo moc przipraw w pojszczodku i wonio. Do moczki trza nom jedyn piernik, ale jo wom godom, kupcie dwa, abo i trzi, bo jedyn na pewno wto zjy jeszcze zanim go zdonżycie skukać przed familiom.

Jedni maszkecom moczka rzodko, inksi tako gysto, że by jom szło nożym kroć. Nikierzy dodowajom szekulada i kakao, inni ni. Som tacy co moczka jedzom, som tacy co jom pijom. Robi sie jom tak trocha na oko, aż bydzie tako, jako se wto wymarzył.

Co nom bydzie trza do moczki?

• jedyn piernik (na jakiś 7-8 litrów moczki)
• 7-9 litrów wody (jak wto woli, to moge dać liter mynij i wloć kompot ze śliwek abo z wieprzków)
• jedne opakowani suszonych fig
• dwie gorście łorzechów włoskich
• dwie gorście mandlów
• jedne opakowani rudzynek
• jedne opakowani suszonych śliwek (nie wyndzonych! bo wom to bydzie smakować jak wyndzonka)
• jedne opakowani suszonych moreli
• skórka z połowy apluzyny
• skórka z jednej wielkij zitrony
• cukier (każdy cukruje tela, wiela mu trza)
• szekulada deserowo abo kakao
• 1/4 abo 1/2 łyżyczki soli

Jak to sie warzi?

Dziyń pryndzyj trza piernik od piekorza pokroć na kostka, wciepnyć do wielkigo kesla i zaloć wodom na noc. Nostympnego dnia do tego kesla dociepujymy pokrote na małe konski bakalie. Mandle trza nojprzód sparzyć i łobrać z tych szupek, bo nom bydom zawadzać. Krejymy na drobno kosteczka skórka z apluzyny, a ta z citrony ściyromy na tarle. Idzie też wyciś sok z zitrony, coby był trocha kwaskowaty szmak. Wsypujymy sól, łomiymy szekulada na kostki i wciepujymy jom,  abo kakao jak wolymy. Mogymy też dać ociupinka prziprawy korzynnej, jak nom to za mało wonio. Trza to trocha powarzić, aż nom to zabulko i sie połonczom wszystki smaki. Styknie jaki 15 minut. Trza to bez tyn czas fyrlać, coby sie nie przipoliło. Moczka idzie jeść na ciepło abo na zimno. Moge stoć w lodówce pora dni, idzie jom tyż zamrozić w jakim kofliku i trzimać w zamrażarce przez jaki trzi miesionce.