fot. Radosław Kaźmierczak

Prziłazisz wykamany z roboty, niy mosz siły na nic i zdjobyś jaki miyso? Na to nojlepsze som karminadle (abo jak niykierzy godajom karbinadle)! Ku tymu jeszcze panczkraut i niywiela wiyncyj potrzeja.

Co nom bydzie potrzeja:

• 40 dag miysa ze świnie
• cebula
• jedno całe jajco, jedno żółtko
• żymła
• sól
• pieprz
• magi
• łolyj

fot. Radosław Kaźmierczak

Jak to sie robi:

1. Miyso zemleć, nojlepij samymu. Niy kupować gotowego zemletego, bo niy wiadomo na co sie trefi.
2. Żymła potonkać we wodzie, aż zmiyknie, Wypuczyć cołko woda.
3. Cebula pokroć fest drobno i przesmarzić na łoleju, aż sie zeszkli.
4.  Zemlete miyso, wypuczono żymła, zeszklono cebulka, jajca dać rajn do jednyj miski. Prziprawić solom, pieprzym, magom. Dobrze wymiyszać.
5.  Z tyj masy pokulać taki plaskate karminadle i gich na rozgrzony łolyj. Smarzić z jednyj i drugij strony. Wachować ino tego, coby sie niy przypoliły, bo przipolony karminadel je gorszy łod surowego.
6.  Maszecić pospołu z kartoflami a manszkrautym.

fot Radosław Kaźmierczak

Te maszkety, kiere tukyj momy pokozane na łobrozkach, uwarziło dlo nos Pole do popisu. To je katowicko ekstra kuchnia w kierej nauczom Cie warzić tak, że żodyn Ci niy powiy że mu niy smakuje a ino bydzie jod aż mu sie bydom uszy trzyńść. Zapraszomy na http://poledopopisu.pl