Brateringi

fot. Radosław Kaźmierczak
fot. Radosław Kaźmierczak


Som taki harynki, kierym niy poradzi żodyn inkszy ślyź. Godom ło brateringach czyli śledziach zielonych w zalewie octowej. Jejich smak bydzie radowoł kożdy hyrtoń a Ci kierzy niy radzi majom łości, niy muszom sie lynkać, bo łości niy znać w nich nic a nic, chocioż som. A recepta na tyn maszket je tako:

Co nom bydzie trza

  • Filety ze śledzi zielonych 1 kg
  • 2 jajca
  • mołka
  • fet (nojlepij łolyj)
  • cebula
  • łocet
  • liści bobkowe, zieli angielski
  • na łoko cukru, magi, korzynio, soli, wegety
fot. Radosław Kaźmierczak
fot. Radosław Kaźmierczak


Jak to sie robi

  1. Filety ze harynków zielonych umyć, posolić, popieprzyć. Nojlepij tyż syjmnyć śnich skóra przed przyprawiynim, to som lepsze.
  2. Jajco rozfyrlać na talyrzu, na drugi talyrz wsypać mołka. Roz wrazić harynek do mołki a roz do jajca i potym zaś do mołki.
  3. Ciepnyć na rozgrzony łolyj i piyc aż sie zeszkliwiom na złoto barwa.
  4. Narychtować zalywa. Do bulkajonyj wody (kajś 1,5 l) ciepnyć cebula, ziele, liście, kapka soli, cukru, magi wegety i 3 łyżki łoctu. Wszyjstko pomiyszać i kosztować podug siebie. Bo przeca jedyn woli jak je wiyncyj łoctu a jedyn barzij słone. Toż to podug siebie trzeja.
  5. Wrazić upieczone harynki do krauzy i zaloć to tom ostudzonom zalywom. Wrazić tam kaj je zima. Jeść nojlepij po dwóch dniach, jak fajnie przyndom.
fot. Radosław Kaźmierczak
fot. Radosław Kaźmierczak

 

Brateringi nojlepij smakujom ze kartoflami uwarzonymi na świyżo i posypanymi koperkiym. Fajne je to, że mogom ty 10 dni poleżeć w zimnym i nic jim niy bydzie. I jeść kiedy sie chce i kaj sie chce.

Tekst:
Klaudia Roksela

Co byś na to pedzioł?

mini

Maria Cunitz – ślonsko Pallas Atena

Kożdy rod podziwo sie na gwiozdki brzyżdżonce na naszym ślonskim niebie. W XVII storoczu żyła se tyż tukyj tako Marika, kiero tyż poradziła tak siedzieć cołkimi godzinami i przi tymu maszkecić ze swojim chopym.

WIYNCYJ »

fot. Radosław Kaźmierczak

Swojski buchty

Tyn, kierego bawiła starka w doma zawdy zno smak prawdziwych buchtów. Som jeszcze buchty, kiere sie pamiynto z przedszkola. Ale to niy było to samo, co wyrobiane w doma przez stareczka i z wielkigo przonio.

WIYNCYJ »