fot. Iwona Łach

Jednom z nojlepszych cech Ślonzoków je szacunek do jedzynio. Nikomu do gowy niy prziszło, coby wyciepnyć resztki z łobiadu abo kraiczek chleba. Robiyło sie wodzionka, bratkartofle abo jaki ajntopf. Kożdy te jodło zno. Ale niy wszyscy wiedzom, że na Ślonsku robiyło sie tyż armeriter. Jak wto znojd w brołtbiksie wczorajszo żymła, lynga abo plycionka, to już mioł śniodani z gowy.

Armeriter po polsku sie nazywo tosty francuskie. Ale wto pedzioł, że yno Francuzy tak jodali? Tak samo jak we Paryżu robiyli je w Bytomiu. Tak po prowdzie to je blank łatwe i gibki śniodani, kierym se pojysz i łod rana humor zrobisz. Wejrzij, jako sie to robi. My zawdy robiymy to wedle przepisu ze ksiożki „Ślonsko kuchnia dla Hanysów i Goroli” łod pani Joanny Furgalińskiej.

Co nom bydzie trza? (Na sztyrech fest głodnych ludzi)

• wczorajszo lynga abo 4 żymły (plecionka tyż sie nado)
• 1 liter mlyka (ale takigo masnego a niy biołej wody z 0,5% fetu)
• 1,5 łeżki cukru (jak mosz plecionka to mynij, bo ona już je pocukrowano)
• 2 jajca łod kury, kiero depce po placu a niy siedzi w klotce
• 1 zitrona
• sól
• skurzica
• puder-cuker
• konsek masła
• wedle uznanio: łowoce, jogurt, miód, dżym abo mermolada, krym szekuladowy

Jako sie to robi?

1. Nojpiyrw trza se pokroć pieczywo na małe kraiczki. Nojlepij kroć pod skosym, wtynczas te kraiczki som trocha wiynksze. Kiej chcesz mieć myńsze konski, bo mosz mało patelnia, to ni ma problymu, kryj na myńsze.

2. Liter mlyka wlyj do gorca, zetrzij tam skóra z zitrony, wciepej 1,5 łeżki cukru, sypnij troszka soli i nasypej łeżyczka skurzicy. Zafyrlej i czekej, aż zacznie wreć. Wtynczos wyłoncz piec i przelyj te mlyko przez cedzitko do jaki miski abo głymbokigo talyrza.

3. W inkszym głymbokim talyrzu rozfyrlej dwa jajca.

4. Bier po kolei kożdo sznitka i zatonkej nojpiyrw we mlyku, a niyskorzyj w jajcach.

5. Na patelnii rozpuść trocha masła, cobyś mioł na czym smażyć. Jak masło już bydzie roztopione, to poukłodej sznitki na patelni i smoż z kożdej strony, aż sie zrobiom złoto-brunotne.

6. Armeriter połóż na talyrzu i ciepnij se na niego to, co Ci szmakuje. My se dali na wiyrch jogurt naturalny, puder-cuker i maliny. Co byś se tam niy położył, to bydziesz mioł szpas.