fot. MMcQuade

Juzaś bydzie szło słyszeć w szkołach jak brzynczy piyrszy dzwonek abo buczek. To bydzie łoznaczać, że je zaczoł sie do szkolorzy rok szkolny. Dziecka i młode szpikole zaczynajom jak co roku nauka.

Nojbardzi przejyńci bydom te, co piyrszy roz wlezom do szkolnych klas. Lica czyrwone z przejyńcio, małe ancugi, maszki pod chyrtoniym, klajdziki i podkolanówki. Obowionzkowo potym z mamulkom, a możno i tatulkiym do zdjyńcio z tytom pełnom roztomańtych maszketów.

Rechtorki tych dziecek tyż przejynte, bo to je pierońsko łodpowiedzialność, coby tych dzieciek najsamprzod niy zrazić do szkoły, bo bydom cołki czas beczeć i chcieć nazod abo do dom abo do przedszkola.

Ci zaś, co już niy piyrszy roz zaczynajom rok szkolny, z opolonymi pycholami łozprawiajom jako to było bez wakacyjno laba. Kaj byli, co robiyli i wiela razy mieli kolana połodziyrane. Te starsze szkolorze łopowiadajom o nowo poznanych kamratach i frelach. Ło tym, że łon był taki wysoki i tak gryfnie pływoł, a ona tako piykno i na kolonijnym fajfie dała mu kuska w lico, tak żeby żodyn niy widzioł. I tak to bydzie ze dwa abo trzi tydnie twało aż zatrybiom i chycom sie za nauka.

Rechtory ni majom tela szpasu. Konferyncje, ukłodani planów, kołomyje kere ksiożki brać a kere ni, żeby byłu dobre, ale ni za drogi, czy w klasach je wszysko zicher i o wystroju ścian trza zaroz rozważować. Zakłodani dziynników i wiela wiela inkszych organizacyjnych spraw tyż rechorów czeko.

I tak już to łod lot kożdego roku wyglondo, a co sie potym spomino latami jak już się szkoła łopuści, pra?