fot. adwriter

Jeżech fest ciekawo, czy pamiyntocie abo żeście słyszeli z łozprawianio łojców abo starzików jak to łonego czasu synki za frelami lotali, a dziołchy udowały jak ich to wcale a wcale niy szpanuje… do czasu. A wyglondalo to mniyj wiyncyj tak:

Jak szpikolom zaczynoł rosnyć fonsiok, to tyż był poczontek oglondanio za dziołszkami. Wdycki kończył sie czas, że jedynom formom zwracanio na sia uwagi było ciongani frelek za warkoczki. Zaczynały sie piyrsze godki, szpacyry, wytargane na miedzy abo kupione kwiotki. Tako porka trzimała sie za rynce i szło tyż od frelki dostać kuska.

Potym był etap sobotnich abo niedzielnych fajfów, pójści do kina abo do jaki restauracyje. Na tako porka godało się, że łoni ze sobom „depcom” abo „godajom”. To troszka czasu tfało. Jak wtynczas prziszoł taki dziyń, że synek niy yno czekoł na frela pod chałupom czy familokiym yno ta wpuszczała go do sia, do ichni izby szluknyć kawa…i tak dali, to już były istne zolyty.

Zolytować abo zolycić znaczyło ni mniyj ni wiyncyj to, że chodzi sie ku dziołsze z kerom kce sie iść do łołtorza po błogosławiyństwo łod Ponbóczka.

Zolytnik bo na synka co już wiedzioł, że to je to, tak sie godało kedyś, deptoł do swoi istnej we środa, sobota, a nikedy i niedziela do jij doma.

Teroz to wyglondo trocha inakszy. Nie trzimie sie już downiejszego, takigo na sztram prawidła. Na taki zolyty deptało sie ze rok, dwa abo i dłuży. Potym synek kupowoł pieścionek ze złota, dowoł go razym z pukietym kwiotków swoi lipście i pytoł jom czy bydzie jego babom.

Mamulce dziołchy tyż dowoł pukiet yno deczko wiynkszy, coby se zaroz na poczontku u prziszłej teściowej niy nagrabić. Jak wszysko szło po myśli synka to wyciongoł z bocznyj kapsy ancuga pół litra gorzołki i z prziszłym teściym wypijoł pora sznapsów za hochzajcfatrów. Przi tym łobiecywoł tatulkowi, że bydzie o jego cera dboł cołki czas i że żodno krziwda przi nimu jyj sie nie stanie.

Tak to kedyś wyglondało. Terozki już to pewniykim je cołkiym inakszy, chocioż o wzglyndy prziszłej teściowej ziyńcie dali dbać muszom. Bo ni ma nic gorszego jak sie chocioż niychconcy zedre ze „mamulkom” na starcie.

Artykuł łostoł napisany bez Zuzia Karwot z Rydułtów.