fot. Details in Pixel

Downij nim niy było jeszcze tabletów, laptopów i inkszej elektroniki, bajtle lotały cołki dziyń po placu. Ale niy chytały się chacharstwa, ino wymyślały roztomańte gry i zabawy, w kere grały czasym łod rana do wieczora.

Żodyn niy siedzioł w doma. Ale niy we wszyski gry mogły grać wszyski dziecka. Dziołszki inakszyj się bawiły i chłopcy tyż. Młodsze bajtle grały z młodszymi i starsze ze starszymi. A kere gry mieli nojbarżij radzi? Poczytejcie sami, w co bawili się za bajtla fani „Gryfnie”. I dopiszczie w komentarzach ło Waszych grach za czasów dzieciństwa.

Kiero z Wos niy podkrodała mamie malowidełek i niy mazała nimi gymby? Abo niy wyciągała ze szranku maminych łachów, łoblykała i wiązała szpagatym coby niy śleciały? Kożdo młodo dziołszka chciała być dorosło a jak niy było dostępu do niykierych rzeczy jak naprzykłod szczewików na kromfleku, trzeja je było se radzić inaczyj i zrobić taki samymu. Jak wspomino nasza fanka

„Robioło sie kronfleki z łotwiyracza z oranżady a jak klupały to było coś!”

Kiery z Wos niy podkrodoł tacie cygaret i po kryjomu niy uczył się ćmić pod klopsztangom a potym charloł? Abo jak wspomino nasza fanka:

„Halba łojcu chowoł- to był szpas!”

Naśladowanie zachowań dorosłych łodbijało się w zabawach bajtli. Myśla, że ni ma takij dziołchy, kiero by za czasów młodości niy bawiła się w dom i niy kleiła z ziymi karminadli abo troszka późnij jak jo hamburgerów, kere przekłodałach wielkimi listkami. Abo wto niy bawił się w sklep? Niy było jako to teroz dostępnych produktów. Ło tym wspomino nasza fanka:

„Dziołchy bawiyli sie w sklep a towor boł ze pustych łopakowań po pudingach a magiwyrfle jak my wpieprzali aż wargi boły biołe…”

Dlo bajtli był ino plac, czasym trocha piochu i nic więcej i łone same musiały ruszyć głową i się zabawić. A w co? Ło tym w następnym artykule.